ഹരിപ്പാട്: സമഗ്ര ശിക്ഷാ അഭിയാന്‍ വാര്‍ഷിക പദ്ധതി പ്രകാരം ഭിന്നശേഷിക്കാരായ കുട്ടികള്‍ക്ക് നല്‍കുന്ന സഹായ ഉപകരണങ്ങളുടെ വിതരണം ഹരിപ്പാട് ബി.ആര്‍.സിയില്‍ നടന്നു. ഇലക്ട്രോണിക് വീല്‍ചെയര്‍, വാക്കര്‍, തെറാപ്പി ബെഡ്, സര്‍ജിക്കല്‍ ഷൂസ്, ഫിസിയോ ബോള്‍, സി.പി. ചെയര്‍, കമോഡ് ചെയര്‍ തുടങ്ങിയ ഉപകരണങ്ങളാണ് നല്‍കിയത്. നഗരസഭാ ചെയര്‍പേഴ്‌സന്‍ വിജയമ്മ പുന്നൂര്‍മഠം വിതരണോദ്ഘാടനം നിര്‍വഹിച്ചു. ബ്ലോക്ക് പ്രോഗ്രാം ഓഫിസര്‍ എം.സുധീര്‍ഖാന്‍ റാവുത്തര്‍ അധ്യക്ഷനായി.നഗരസഭാ വൈസ് ചെയര്‍മാന്‍ കെ.എം.രാജു, സി.രാജലക്ഷ്മി, കെ.വി.ഷാജി, രജനി സോമന്‍ സംസാരിച്ചു.