പെരിങ്ങോം (കണ്ണൂര്‍): പൊന്നമ്പാറയില്‍ മോട്ടോര്‍ ബൈക്കുകള്‍ കൂട്ടിയിടിച്ച് രണ്ടു യുവാക്കള്‍ മരിച്ചു. കരിപ്പോട് സ്വദേശി മാടപ്പാടി അഖിലേഷ് (22), പെരിങ്ങോം ഗവ. ഹയര്‍ സെക്കന്‍ഡറി സ്‌കൂളിന് സമീപത്തെ എടാടന്‍ വീട്ടില്‍ രാഹുല്‍ (22) എന്നിവരാണ് മരിച്ചത്. ഇന്നലെ രാവിലെ എട്ടോടെ പൊന്നമ്പാറ ജങ്ഷനിലായിരുന്നു അപകടം. രാഹുല്‍ പാടിയോട്ടുചാല്‍ ഭാഗത്തേക്കും അഖിലേഷ് പെരിങ്ങോം ഭാഗത്തേക്കും പോവുകയായിരുന്നു. രാഹുല്‍ സംഭവസ്ഥലത്തും അഖിലേഷ് പരിയാരം മെഡിക്കല്‍ കോളജിലേക്കു കൊണ്ടുപോകും വഴിയുമാണ് മരിച്ചത്. കരിപ്പോട്ടെ ഓട്ടോ ടാക്‌സി ഡ്രൈവറായ മാടപ്പാടി സന്തോഷിന്റെയും സിന്ധുവിന്റെയും മകനാണ് അഖിലേഷ്. സഹോദരന്‍: ആകാശ് (പ്ലസ്‌വണ്‍ വിദ്യാര്‍ഥി, പെരിങ്ങോം ഗവ. ഹയര്‍ സെക്കന്‍ഡറി സ്‌കൂള്‍). മൃതദേഹം കരിപ്പോട് വീട്ടുവളപ്പില്‍ സംസ്‌കരിച്ചു. രമേശന്റെയും എടാടന്‍വീട്ടില്‍ ബിന്ദുവിന്റെയും മകനാണ് രാഹുല്‍. സഹോദരി: രഹന (ബിരുദ വിദ്യാര്‍ഥിനി, ചാനെടുക്കം അപ്ലൈഡ് സയന്‍സ് കോളജ്). മൃതദേഹം ഇന്നുരാവിലെ ഒന്‍പതിന് പെരിങ്ങോം ഷേണായി സ്മാരക ഹാളില്‍ പൊതുദര്‍ശനത്തിനു വച്ച ശേഷം പത്തിന് തറവാട്ടുവളപ്പില്‍ സംസ്‌കരിക്കും.