എടച്ചേരി: വായനാ ശീലം മനുഷ്യന്റെ മനസ് ശുദ്ധമാക്കാനും അതുവഴി അവനെ നന്മയിലേക്ക് നയിക്കാനും സഹായകമാണെന്ന് പ്രശസ്ത സാഹിത്യകാരനും വയലാര്‍ അവാര്‍ഡ് ജേതാവുമായ യു.കെ കുമാരന്‍ അഭിപ്രായപ്പെട്ടു. നരിക്കുന്ന് യു.പി സ്‌കൂളില്‍ നവീകരിച്ച ലൈബ്രറിയുടെ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
സ്‌കൂളിലെ 42 ക്ലാസ് ലൈബ്രറികളും ചടങ്ങില്‍ ഉദ്ഘാടനം ചെയ്തു. മനുഷ്യത്വം ഉള്ള സമൂഹത്തെ സൃഷ്ടിക്കാനും നന്മയും അറിവുമുള്ള തലമുറയെ വാര്‍ത്തെടുക്കാനും വിദ്യാര്‍ഥികള്‍ക്ക് വായനയിലൂടെ കഴിയുമെന്നും എഴുതാനും വായിക്കാനും അധ്യാപകര്‍ നിര്‍ബന്ധമായും കുട്ടികളില്‍ ചെറുപ്രായത്തില്‍ തന്നെ പ്രേരണ ചെലുത്തണമെന്നും അദ്ദേഹം തുടര്‍ന്ന് പറഞ്ഞു. എടച്ചേരി ഗ്രാമപഞ്ചായത്ത് പ്രസിഡന്റ് ടി.കെ അരവിന്ദാക്ഷന്‍ അധ്യക്ഷനായി. 42 ക്ലാസ് ലൈബ്രറി കളുടെയും പ്രഖ്യാപനം ചോമ്പാല എ.ഇ.ഒ സുരേന്ദ്രന്‍ കാവുതിയാട്ട് നിര്‍വഹിച്ചു.  ജനപ്രതിനിധികളായ ഷീമ വള്ളില്‍, ഇ. ഗംഗാധരന്‍, മഹിജ, ബി.പി.ഒ പ്രദീപന്‍, സ്‌കൂള്‍ മാനേജര്‍ എം.പി ബാലകൃഷ്ണന്‍, ഗ്രന്ഥകാരനായ വി. കുഞ്ഞിക്കണ്ണന്‍, നാദാപുരം പ്രസ് ക്ലബ്ബ് സെക്രട്ടറി വത്സരാജ് മണലാട്ട്, പി.ടി.എ പ്രസിഡന്റ് അനില്‍കുമാര്‍, എം.പി.ടി.എ പ്രസിഡന്റ് സുനിത, എസ്.എസ്.ജി കണ്‍വീനര്‍ രാജീവ് വി, എം.കെ പ്രേമദാസ്, സി. പവിത്രന്‍, പി. നാരായണന്‍ പ്രസംഗിച്ചു. പ്രധാനാധ്യാപിക സുമ വി.പി സ്വാഗതവും സത്യന്‍ പാറോല്‍ നന്ദിയും പറഞ്ഞു.