കാബൂള്‍: മുതിര്‍ന്ന താലിബാന്‍ കമാന്‍ഡര്‍ അഫ്ഗാനിസ്ഥാനില്‍ വ്യോമാക്രമണത്തില്‍ കൊല്ലപ്പെട്ടു. വടക്കന്‍ അഫ്ഗാനില്‍ നടന്ന ആക്രമണത്തിലാണ് മുല്ലാ അബ്ദുല്‍ സലാം അഖുന്ദ് കൊലപ്പെട്ടത്.
ഡ്രോണ്‍ ആക്രമണത്തിലാണ് മുല്ലാ അബ്ദുല്‍ സലാം കൊല്ലപ്പെട്ടത്. മറ്റ് ഏഴുപേരും ആക്രമണത്തില്‍ മരിച്ചിട്ടുണ്ട്. താലിബാന്‍ വക്താവ് സബീഹുല്ലാ മുജാഹിദ് അബ്ദുല്‍ സലാമിന്റെ മരണം സ്ഥിരീകരിച്ചിട്ടുണ്ട്. സംഭവത്തിന് ഉത്തരവാദികള്‍ അമേരിക്കയാണെന്നും സബീഹുല്ല ആരോപിച്ചു.
2015ലെ കുന്ദുസ് പിടിച്ചടക്കിയ താലിബാന്‍ നീക്കത്തിനു മേല്‍നോട്ടം വഹിച്ചയാളാണ് മുല്ലാ അബ്ദുല്‍ സലാം. അമേരിക്കന്‍ ജെറ്റാണ് ആക്രമണം നടത്തിയതെന്ന് യു.എസ് സൈനിക വക്താവ് വ്യക്തമാക്കി. എന്നാല്‍, സംഭവത്തില്‍ എത്രപേര്‍ മരിച്ചെന്നു വ്യക്തമല്ലെന്നും അദ്ദേഹം അറിയിച്ചു.
താലിബാന്‍ നിയന്ത്രണം ശക്തമാക്കുന്ന ഹെല്‍മന്ദ്, ഉറുസ്ഗാന്‍ മേഖലകളിലും കഴിഞ്ഞ ദിവസം ആക്രമണമുണ്ടായി.