കാഞ്ഞങ്ങാട്: മികവുത്സവം കെങ്കേമമാക്കി പാണക്കാട് പൂക്കോയ തങ്ങള്‍ സ്മാരക എ.എല്‍.പി സ്‌കൂള്‍. ഈ വര്‍ഷം 168 വിദ്യാര്‍ഥികളാണ് കാഞ്ഞങ്ങാട് കടപ്പുറത്തെ സ്‌കൂളില്‍ ഒന്നാം തരത്തിലേക്ക് പ്രവേശിച്ചത്.
കാഞ്ഞങ്ങാട് വിദ്യാഭ്യാസ ഉപജില്ലയില്‍ ഈ വര്‍ഷം ഏറ്റവും കൂടുതല്‍ വിദ്യാര്‍ഥികള്‍ ഒന്നാം ക്ലാസിലേക്ക് പ്രവേശനം നടത്തിയത് ഈ സ്‌കൂളിലാണ്. 78 ആണ്‍ കുട്ടികളും 90 പെണ്‍ക്കുട്ടികളുമാണ് ഇപ്പ്രാവശ്യം സ്‌കൂളില്‍ പ്രവേശനം നേടിയത്. കഴിഞ്ഞ വര്‍ഷം ഇത് 144 വിദ്യാര്‍ഥികളായിരുന്നു. മുന്‍ വര്‍ഷത്തെ അപേക്ഷിച്ച് 24 കുട്ടികളാണ് ഇവിടെ ഒന്നാം തരത്തിലേക്ക് അധികമായി വന്നത്.
ഇതോടെ ഈ വര്‍ഷം ഒന്നാം ക്ലാസ് നാല് ഡിവിഷനുകളായാണു ഇവിടെ പ്രവര്‍ത്തിക്കുന്നത്. ഇതിന് പുറമേ പ്രീ പ്രൈമറി ക്ലാസുകളില്‍ 182 കുട്ടികളും ഇവിടെ പഠനം നടത്തുന്നുണ്ട്. നാലാം ക്ലാസ് വരെയുള്ള ഈ സ്‌കൂളില്‍ മൊത്തം ഡിവിഷന്‍ ഉള്‍പ്പെടെ ഇരുപതോളം ക്ലാസുകള്‍ നടന്നു വരുന്നു.
തീരദേശ മേഖലയിലെ ഈ സ്‌കൂളില്‍ എല്ലാ വിഭാഗം കുട്ടികളും പഠനം നടത്തി വരുന്നു. കാഞ്ഞങ്ങാട് കടപ്പുറം മുഹ്‌യദ്ദീന്‍ ജുമാ മസ്ജിദ് മാനേജിങ് കമ്മിറ്റി, സ്‌കൂള്‍ പി.ടി.എ കമ്മിറ്റി എന്നിവയുടെ നേതൃത്വത്തിലാണ് സ്‌കൂളിന്റെ പ്രവര്‍ത്തനങ്ങള്‍ നിയന്ത്രിക്കുന്നത്.
കഴിഞ്ഞ തവണ ജില്ലയില്‍ രണ്ടാം സ്ഥാനം കരസ്ഥമാക്കിയതായി സ്‌കൂള്‍ അധികൃതര്‍ പറഞ്ഞു.