പാറക്കടവ്: കഴിഞ്ഞ ദിവസം മയ്യഴി പുഴയിലേക്ക് മറിഞ്ഞ ഇന്നോവ കാറില്‍ സഞ്ചരിച്ച യുവാക്കളെ വെള്ളത്തിനടിയില്‍ നിന്ന് സാഹസികമായി രക്ഷപ്പെടുത്തിയ ഷഹീറിന് അഭിനന്ദന പ്രവാഹം.
വേവത്തെ ബന്ധുവീട്ടില്‍ നിന്ന് തിരിച്ച് വരികയായിരുന്ന വളയം കുയ്‌തേരിയിലെ റിസ്വാനും അര്‍ഷാദുമാണ് അപകടത്തില്‍പ്പെട്ടത്. പഴയങ്ങാടി പുഴയോരത്ത് കൂടിയുള്ള വഴിയില്‍ സഞ്ചരിക്കവേ ദിശമാറി നിയന്ത്രണം വിട്ട് കാര്‍ പുഴയിലേക്ക് മറിയുകയായിരുന്നു. ആഴമേറിയ സ്ഥലത്ത് തെറിച്ചുവീണ കാറില്‍ നിന്നും അര്‍ഷാദ് പൊട്ടിയ ഗ്ലാസിലൂടെ രക്ഷപ്പെട്ടെങ്കിലും റിസ്വാനും കാറും മുങ്ങിപ്പോവുകയായിരുന്നു.
ഈ സമയത്ത് ബൈക്കിലെത്തിയ ഷഹീര്‍ വെള്ളത്തിലേക്ക് ചാടി കാറിന്റെ വാതില്‍ തുറന്ന് സാഹസികമായി രക്ഷപ്പെടുത്തി ആശുപത്രിയിലെത്തിക്കുകയായിരുന്നു. നാടിന്റെ വിവിധ ഭാഗങ്ങളില്‍ നിന്ന് ഷഹീറിനെ തേടി അഭിനന്ദന പ്രവാഹം ഒഴുകിയെത്തുകയാണ് ഇപ്പോള്‍. ചെക്യാട് പഞ്ചായത്ത് ഭരണ സമിതി ഏര്‍പ്പെടുത്തിയ അനുമോദന ചടങ്ങില്‍ ഗ്രാമപഞ്ചായത്ത് പ്രസിഡന്റ് തൊടുവയില്‍ മഹമൂദ് ഉപഹാരം നല്‍കി. സ്റ്റാന്റിങ് കമ്മിറ്റി ചെയര്‍മാന്‍ മഹമൂദ് എടവലത്ത് അധ്യക്ഷനായി. പഞ്ചായത്ത് അംഗങ്ങളായ പി.കെ ഹനീഫ , സി.കെ ജമീല, കെ.പി കുമാരന്‍, നസീമ കൊട്ടാരം, ഡോ. മുംതാസ് സംബന്ധിച്ചു.