തിരുവനന്തപുരം: കേരളത്തില്‍ അന്തിമ വോട്ടര്‍പട്ടിക പ്രസിദ്ധീകരിക്കാനുള്ള തിയതി ഇലക്ഷന്‍ കമ്മിഷന്‍ നീട്ടി. 15ന് പ്രസിദ്ധീകരിക്കാനാണ് നേരത്തെ നിശ്ചയിച്ചിരുന്നതെങ്കിലും 30 വരെ തിയതി നീട്ടി നല്‍കുകയായിരുന്നു. അന്തിമ വോട്ടര്‍പട്ടിക പ്രിന്റ് എടുക്കുന്നതിനുള്ള ഇ.ആര്‍.ഒ നെറ്റ് സംവിധാനത്തിലെ സാങ്കേതിക തടസത്തെ തുടര്‍ന്നാണ് ഇലക്ഷന്‍ കമ്മിഷന്‍ തിയതി നീട്ടി നല്‍കിയത്.
അന്തിമ പട്ടിക പ്രിന്റ് ചെയ്യുന്നതിനുള്ള നടപടികള്‍ പൂര്‍ത്തിയാക്കി അനുമതിക്കായി സംസ്ഥാന ചീഫ് ഇലക്ടറല്‍ ഓഫിസര്‍ ഇലക്ഷന്‍ കമ്മിഷന് കത്ത് നല്‍കിയിരുന്നു. ചീഫ് ഇലക്ടറല്‍ ഓഫിസറുടെ നേതൃത്വത്തില്‍ പ്രിന്റിങ്ങിനുള്ള എല്ലാ തയാറെടുപ്പുകളും പൂര്‍ത്തിയാക്കിയ ശേഷം പരിശോധിക്കുമ്പോഴാണ് സാങ്കേതിക തടസം ശ്രദ്ധയില്‍പെട്ടത്.
തുടര്‍ന്ന് ചീഫ് ഇലക്ടറല്‍ ഓഫിസര്‍ നേരിട്ട് ഡല്‍ഹിയിലെത്തി ഇലക്ഷന്‍ കമ്മിഷനെ വിവരം ധരിപ്പിക്കുകയും സാങ്കേതിക പ്രശ്‌നം എത്രയും വേഗം പരിഹരിക്കേണ്ടതിന്റെ ആവശ്യകതയും അറിയിച്ചു. സംസ്ഥാനത്ത് വോട്ടര്‍ പട്ടികയില്‍ പേരു ചേര്‍ക്കാന്‍ പുതിയതായി ആറു ലക്ഷം പേരാണ് അപേക്ഷ നല്‍കിയിട്ടുള്ളത്.