കുന്നംകുളം: പെരുമ്പിലാവ് പരുവക്കുന്നില്‍ പുലി ഇറങ്ങിയതായി അഭ്യൂഹം. പൊലിസും നാട്ടുകാരും തിരച്ചില്‍ നടത്തി. കഴിഞ്ഞ ദിവസം രാത്രി 10 ഓടെ പഞ്ചായത്ത് ഓഫിസിനു സമീപത്തുള്ള അപ്പുവിന്റെ വീട്ടുപറമ്പിലാണ് പുലിയെ കണ്ടതായി പറയുന്നത്. തുടര്‍ന്ന് പൊലിസിനെ അറിയിച്ചു.
കുന്നംകുളം അഡീഷണല്‍ എസ്.ഐ രാജന്റെ നേതൃത്വത്തിലുള്ള പൊലിസ് സംഘം എത്തി മേഖലയില്‍ തിരച്ചില്‍ നടത്തിയെങ്കിലും സംശയാസ്പദമായി ഒന്നും കണ്ടെത്താനായില്ല. 20 വര്‍ഷം മുന്‍പ് പരുവക്കുന്നില്‍ പുലിയെ കണ്ടെത്തിയിരുന്നു. നാടിനെ ആകെ വിറപ്പിച്ച പുലിയെ പിന്നീട് പിടികൂടി. പുലിയുടെ ആക്രമത്തില്‍ അന്ന് പരിസരവാസികള്‍ക്ക് പരുക്കേറ്റിരുന്നു. 2007 ല്‍ പെരുമ്പിലാവ് കൊരട്ടിക്കരയിലും പുലി ഇറങ്ങിയതായി അഭ്യൂഹം പരന്നിരുന്നു.
തുടര്‍ന്ന് അന്നത്തെ എസ്.ഐ ആയിരുന്ന ദേവസിയുടെ നേതൃത്വത്തില്‍ രാത്രി മുഴുവന്‍ പരിശോധന നടത്തിയെങ്കിലും രാവിലെയോടെ അത് കാട്ടു പൂച്ചയായിരുന്നുവെന്ന് സ്ഥീകരിക്കുകയായിരുന്നു.
പിന്നീട് മേഖല പുലി പേടിയിലായിരുന്നു മാസങ്ങളോളം. ഇന്നലെ രാത്രിയുണ്ടായ പുലി അഭ്യൂഹത്തിനു പുറകില്‍ കാട്ടുപൂച്ചയാണെന്നാണ് പൊലിസ് നിഗമനം. എന്നാല്‍ കാല്‍പാടുകളൊന്നും കണ്ടെത്താനായിട്ടില്ല.