തിരുവനന്തപുരം: ഇംഗ്ലണ്ട് ലയണ്‍സിനെതിരായ സന്നാഹ മത്സരങ്ങള്‍ക്കുള്ള ബോര്‍ഡ് പ്രസിഡന്റ്‌സ് ഇലവന്‍ ടീം തലസ്ഥാനത്ത് എത്തി. നാളെയും 20നും തിരുവനന്തപുരം കെ.സി.എ സെന്റ് സേവ്യേഴ്‌സ് കോളജ് ഗ്രൗണ്ടിലാണ് മത്സരങ്ങള്‍. ഇംഗ്ലണ്ട് ലയണ്‍സ് ടീം 13 ന് എത്തിയിരുന്നു. ഇരു ടീമുകളും ഇന്ന് സെന്റ് സേവ്യേഴ്‌സ് ഗ്രൗണ്ടില്‍ പരിശീലനം നടത്തും. ഇംഗ്ലണ്ട് ലയണ്‍സ് ടീം രാവിലെ ഒന്‍പതു മുതല്‍ 12 വരെയും ബോര്‍ഡ് പ്രസിഡന്റ്‌സ് ഇലവന്‍ ടീം ഉച്ചയ്ക്ക് രണ്ടു മുതല്‍ അഞ്ചു വരെയുമാണ് പരിശീലനം നടത്തുക.
23ന് തുടങ്ങുന്ന ഏകദിന മത്സരങ്ങള്‍ക്കായി ഇന്ത്യ എ ടീം 20ന് തിരുവനന്തപുരത്ത് എത്തും. ഇന്ത്യ എ ടീം 21ന് സെന്റ് സേവ്യേഴ്‌സിലും 22ന് സ്‌പോര്‍ട്‌സ് ഹബ്ബിലും പരിശീലനം നടത്തും. 23, 25, 27, 29, 31 തിയതികളില്‍ കാര്യവട്ടം സ്‌പോര്‍ട്‌സ് ഹബ്ബിലാണ് അഞ്ച് ഏകദിന മത്സരങ്ങളും നടക്കുക. ചതുര്‍ദിന മത്സരം ഫെബ്രുവരി ഏഴു മുതല്‍ 10 വരെ കൃഷ്ണഗിരി സ്റ്റേഡിയത്തില്‍ നടക്കും.ഏകദിന മത്സരങ്ങള്‍ പൊതുജനങ്ങള്‍ക്ക് സൗജന്യമായി കാണാനാകുമെന്ന് കേരള ക്രിക്കറ്റ് അസോസിയേഷന്‍ അറിയിച്ചു. മത്സരം കാണാന്‍ എത്തുന്നവര്‍ക്ക് ഒന്നാം നമ്പര്‍ ഗേറ്റിലൂടെ സ്റ്റേഡിയത്തിന് ഉള്ളില്‍ പ്രവേശിക്കാം.