ഗൂഡല്ലൂര്‍: മുതുമല കടുവാസങ്കേതത്തില്‍ നിരീക്ഷണ കാമറകള്‍ സ്ഥാപിച്ച് കടുവകളുടെ കണക്കെടുപ്പ് ആരംഭിച്ചു.
മുതുമല കടുവാ സങ്കേതത്തില്‍പ്പെട്ട തെപ്പക്കാട്, മസിനഗുടി, കാര്‍ക്കുടി, നെല്ലാക്കോട്ട എന്നീ റെയ്ഞ്ചുകളിലായി 191 സ്ഥലങ്ങളില്‍ രണ്ട് വീതം കാമറകളാണ് സ്ഥാപിക്കുന്നത്. മൊത്തം 382 കാമറകളാണ് കണക്കെടുപ്പിന്റെ ഭാഗമായി സ്ഥാപിക്കുന്നത്. കാമറയില്‍ പതിയുന്ന ചിത്രങ്ങള്‍ മൂന്നുദിവസങ്ങളില്‍ ഒരിക്കല്‍ പരിശോധിക്കും. ഇരുപത്തഞ്ച് ദിവസം നീണ്ടുനില്‍ക്കുന്ന കണക്കെടുപ്പിനു ശേഷം മുതുമല സങ്കേതത്തിനു പുറത്തുള്ള വനമേഖലയിലും കടുവകളുടെ കണക്കെടുപ്പ് നടക്കുമെന്ന് വനം വകുപ്പ് ഉദ്യോഗസ്ഥര്‍ പറഞ്ഞു. കണക്കെടുപ്പില്‍ വനം വകുപ്പ് ജീവനക്കാര്‍ക്ക് പുറമെ സന്നദ്ധ സംഘടനാ പ്രവര്‍ത്തകരും പങ്കെടുക്കുന്നുണ്ട്.