വെഞ്ഞാറമൂട്: നിയന്ത്രണം വിട്ട കാര്‍ കുഴിയിലേയ്ക്ക് മറിഞ്ഞ് രണ്ട് യുവാക്കള്‍ക്ക് ഗുരുതര പരുക്ക്.
കാര്‍ ഡ്രൈവര്‍ പഴയചന്ത ഹരിശ്രീയില്‍ രാജേഷ്‌കുമാര്‍ (46), വാമനപുരം, കണിച്ചോട്, ബിനുഭവനില്‍ ബിനുകുമാര്‍ (40) എന്നിവര്‍ക്കാണ് പരുക്കേറ്റത്.
കഴിഞ്ഞ ദിവസം വൈകുന്നേരം ആറ് മണിയോടെ കുറ്റിമൂട് ജങ്ഷന് സമീപത്തുവച്ചായിരുന്നു അപകടം. കല്ലറയില്‍ ഭാഗത്തു നിന്നും വാമനപുരം ഭാഗത്തേയ്ക്ക് പോകുകയായിരുന്ന മാരുതി കാറാണ് അപകടത്തില്‍പ്പെട്ടത്.
എതിരേ വരുകയായിരുന്ന വാഹനത്തിന് സൈഡ് കൊടുക്കവെ നിയന്ത്രണം വിട്ട് റോഡരികിലെ പാര്‍പെറ്റ് ഇടിച്ചു തകര്‍ത്ത് ഇരുനൂറ് അടിയോളം താഴ്ച്ചയിലേക്ക് മറയുകയായിരുന്നു. ഇടിയുടെ ആഘാതത്തില്‍ കാല്‍മുട്ടിലെ ചിരട്ടയ്ക്ക് ഗുരുതരമായി പരുക്കുപറ്റിയ ബിനുകുമാറിനെ തിരുവനന്തപുരം മെഡിക്കല്‍ കോളജ് ആശുപത്രിയിലും , രാജേഷ് കുമാറിനെ വെഞ്ഞാറമൂട് ശ്രീ ഗോകുലം മെഡിക്കല്‍ കോളജ് ആശുപത്രിയിലും പ്രവേശിപ്പിച്ചു. വെഞ്ഞാറമൂട് പൊലിസ് മേല്‍നടപടി സ്വീകരിച്ചു.