വിഴിഞ്ഞം: വിദേശ വിനോദ സഞ്ചാരികളുടെ വരവ് കുറഞ്ഞതിനെ തുടര്‍ന്ന് നിറം മങ്ങിയ കോവളത്തെ ടൂറിസം മേഖലക്ക് നേരിയ ഉണര്‍വേകി സഞ്ചാരികളുമായി ആഡംബര കപ്പല്‍ സില്‍വര്‍ ഡിസ്‌കവറി വീണ്ടും വിഴിഞ്ഞം തീരത്ത് എത്തി.
ലക്ഷദ്വീപില്‍ നിന്ന് കൊളംബോക്കുള്ള യാത്രാമധ്യേ ഇന്നലെ രാവിലെ ഏഴുമണിയോടെയാണ് ആഡംബരകപ്പല്‍ വിഴിഞ്ഞത്ത് നങ്കൂരമിട്ടത്. ബ്രിട്ടണ്‍, കാനഡ, ഫ്രാന്‍സ് എന്നീരാജ്യങ്ങളില്‍ നിന്നുള്ള സഞ്ചാരികള്‍ക്കൊപ്പം ഇന്ത്യന്‍ വംശജരായ പത്തു പേരും ഉല്‍പ്പടെ 101 സഞ്ചാരികളാണ് ദൈവത്തിന്റെ സ്വന്തം നാടുകാണാന്‍ എത്തിയത്. ഇവരോടൊപ്പം കപ്പലിന്റെ ക്യാപ്റ്റനടക്കം 112 ജീവനക്കാരും കപ്പലിലുണ്ടായിരുന്നു. വലിപ്പക്കൂടുതല്‍ കാരണം തീരത്ത് അടുപ്പിക്കാന്‍ കഴിയാത്തതിനെ തുടര്‍ന്ന് ആഡംബര ഭീമനായ കപ്പല്‍ പുറംകടലിലാണ് നങ്കൂരമിട്ടത്. തുടര്‍ന്ന് കപ്പലില്‍ എത്തിയ പോര്‍ട്ട് പര്‍സര്‍ സുരേന്ദ്രനാഥ്, വാര്‍ഫ് സൂപ്പര്‍വൈസര്‍ അജീഷ്, സിഗ്‌നലര്‍ സുനിമോള്‍, കസ്റ്റംസ് സൂപ്പര്‍വൈസര്‍ ശോഭന്‍സിന്ധു എന്നിവരുടെ നേതൃത്വത്തില്‍ എമിഗ്രേഷന്‍ ക്ലിയറന്‍സ് അടക്കമുള്ള നടപടികള്‍ പൂര്‍ത്തിയാക്കിയ ശേഷം ഡിങ്കി ബോട്ടുകളില്‍ സഞ്ചാരികളെ തീരത്തെത്തിക്കുകയായിരുന്നു.അവിടെ നിന്നും പ്രത്യേകം തയാറാക്കിയ വാഹനങ്ങളില്‍ വിവിധ തലസ്ഥാനത്തടക്കം വിവിധ സ്ഥലങ്ങളിലെ കാഴ്ചകള്‍ കാണാനായി പുറപ്പെട്ടു. നഗരക്കാഴ്ചകളില്‍ നിന്നും ഉച്ചക്ക് ശേഷം വിനോദസഞ്ചാരികള്‍ മടങ്ങിയെത്തിയതോടെ വൈകിട്ട് നാലുമണിയോടെ കൊളംബോ ലക്ഷ്യമാക്കി കപ്പല്‍ യാത്ര തിരിച്ചു.
ഇതിനു മുന്‍പും പല പ്രാവശ്യം വിനോദ സഞ്ചാരികളുമായി എത്തിയിരുന്ന സില്‍വര്‍ ഡിസ്‌കവറിയില്‍ സാധാരണ മൂന്നൂറിലധികം വിനോദ സഞ്ചാരികളെങ്കിലും എത്തിയിരുന്നു.ഈ സീസണില്‍ ശുഷ്‌കമായ 101 വിനോദ സഞ്ചാരികളുമായാണ് വരവ് വിനോദസഞ്ചാര മേഖലയുടെ മാറ്റുകുറയുന്നതിന്റെ സൂചനയാണിത് . മുന്‍ കാലങ്ങളില്‍ സീസണുകളില്‍ നിരവധി കപ്പലുകള്‍ സഞ്ചാരികളുമായി വിഴിഞ്ഞത്ത് എത്തിയിരുന്നെങ്കിലും കഴിഞ്ഞ രണ്ടു വര്‍ഷമായി സഞ്ചാരികളെത്തുന്നത് വിരളമായിട്ടാണ്.രണ്ടു മാസം മുന്‍പ് എണ്ണൂറോളം യാത്രക്കാരുമായി വിഴിഞ്ഞത്തെത്തി പുറംകടലില്‍ നങ്കൂരമിട്ട അമേഡിയ എന്ന കൂറ്റന്‍ ആഢംബര കപ്പലിലെ വിനോദ സഞ്ചാരികള്‍ക്ക് കടലിന്റെ പ്രക്ഷുബ്ദ്ധാ അവസ്ഥകാരണം കപ്പലിന് പുറത്തിറങ്ങാന്‍ കഴിഞ്ഞിരുന്നില്ല. മണിക്കൂറുകളോളം പുറംങ്കടലില്‍ കാത്ത് കിടന്ന സഞ്ചാരികള്‍ നിരാശയോടെ മടങ്ങുകയായിരുന്നു.