ശാസ്താംകോട്ട: നവജാത ശിശുവിനെ വഴിയരികില്‍ ഉപേക്ഷിച്ച നിലയില്‍ കണ്ടെത്തി. ബുധനാഴ്ച രാത്രി 11.30ഓടെയാണ് സംഭവം. ശാസ്താംകോട്ട ടൗണ്‍ക്ഷേത്ര റോഡില്‍ പഴയ പൊലിസ് എയ്ഡ്‌പോസ്റ്റിനോട് ചേര്‍ന്ന ആല്‍ത്തറയ്ക്കു സമീപത്തെ കടയുടെ തട്ടില്‍ തുണിയില്‍ പൊതിഞ്ഞ നിലയിലാണ് കുഞ്ഞിനെ കാണപ്പെട്ടത്. കട പൂട്ടി വീട്ടിലേക്ക് പോകുന്നതിനിടെ സഹോദരങ്ങളായ രണ്ടു യുവാക്കളാണ് കുഞ്ഞിന്റെ കരച്ചില്‍ കേട്ടത്.
ശാസ്താംകോട്ട പൊലിസില്‍ അറിയിച്ചശേഷം കുഞ്ഞിനെ താലൂക്ക് ആശുപത്രിയില്‍ എത്തിക്കുകയായിരുന്നു. പ്രസവിച്ച് മൂന്നു ദിവസം മാത്രം പ്രായമുള്ള പെണ്‍കുട്ടിക്ക് വിദഗ്ധമായ പരിശോധനയില്‍ ശാരീരിക പ്രശ്‌നങ്ങള്‍ ഇല്ലെന്നു കണ്ടെത്തിയിട്ടുണ്ട്. കുഞ്ഞിനെ കൊല്ലം ജില്ലാ ആശുപത്രിയിലെ അമ്മത്തൊട്ടിലിലേക്ക് മാറ്റി. ഉപേക്ഷിച്ച സ്ഥലത്തെയും ടൗണിലെയും വ്യാപാര സ്ഥാപനങ്ങളിലെ സിസിടിവി ദൃശ്യങ്ങള്‍ കേന്ദ്രീകരിച്ച് ശാസ്താംകോട്ട പൊലിസ് അന്വേഷണം ആരംഭിച്ചു.