കോഴിക്കോട്: ഗതാഗത ബോധവല്‍ക്കരണ ശ്രമത്തിനായി പൊലിസ് കമ്മിഷണറുടെ സീറോ അവര്‍ കാംപയിനില്‍ ആദ്യദിനം വലയിലായത് 946 പേര്‍. ഹെല്‍മെറ്റ് ധരിക്കാതെ യാത്രചെയ്തവരാണ് ആദ്യദിനത്തില്‍ കുടുങ്ങിയ മിക്കവരും. നിയമലംഘനം നടത്തുന്നവരെ പിടികൂടി കേസെടുക്കാതെ ബോധവല്‍ക്കരണ ക്ലാസുകളില്‍ പങ്കെടുപ്പിക്കുകയാണ് സീറോ അവര്‍ പദ്ധതി. നഗരത്തിലെ വിവിധ പൊലിസ് സ്റ്റേഷനുകളും ട്രാഫിക്, കണ്‍ട്രോള്‍ യൂനിറ്റുകളും സംയുക്തമായാണു പരിശോധന നടത്തുന്നത്. ഇന്നലെ രാവിലെ 10 മുതല്‍ 11 വരെയായിരുന്നു പരിശോധന. 529 പേരെ വിവിധ പൊലിസ് സ്റ്റേഷനുകള്‍ വഴിയും 253 എണ്ണം ട്രാഫിക് പൊലിസ്, 164 കണ്‍ട്രോള്‍ റൂം വഴിയുമാണു പിടികൂടിയത്. പരിശോധനകള്‍ എല്ലാ ദിവസവും തുടരും.
പരിശോധന നടത്തേണ്ട സമയം അതതു സമയങ്ങളില്‍ കണ്‍ട്രോള്‍ റൂമില്‍നിന്ന് വിവിധ പൊലിസ് സ്റ്റേഷനുകളില്‍ അറിയിക്കും. ഇന്നലെ നഗരത്തിലെ 30 സ്ഥലങ്ങളിലാണു പരിശോധന നടന്നത്. ഹെല്‍മെറ്റും സീറ്റ് ബെല്‍റ്റും ധരിക്കാതിരിക്കുക, വാഹനങ്ങളില്‍ പരിധിയിലും കൂടുതല്‍ യാത്രക്കാരെ കയറ്റുക, കൃത്യമായി നമ്പര്‍പ്ലേറ്റ് ഘടിപ്പിക്കാതിരിക്കുക, വാഹനങ്ങളുടെ രൂപമാറ്റം എന്നിവയെല്ലാം ഗതാഗത നിയമലംഘനങ്ങളില്‍പെടും.
സിറ്റി പൊലിസ് കമ്മിഷണര്‍, അസി. കമ്മിഷണര്‍മാര്‍, സി.ഐമാര്‍, എസ്.ഐമാര്‍ എന്നിവര്‍ നേതൃത്വം നല്‍കുന്ന 50 അംഗ സ്‌ക്വാഡുകളാണ് സീറോ അവറിനു നേതൃത്വം നല്‍കുന്നത്. വിദ്യാര്‍ഥികള്‍ റോഡിലുണ്ടാകുന്ന സമയങ്ങളില്‍ എസ്.പി ഉള്‍പ്പെടെയുള്ള ഉദ്യോഗസ്ഥര്‍ റോഡില്‍ സജീവമായുണ്ടാകും. സീറോ അവര്‍ പരിശോധനയ്ക്കിടെ രേഖകളൊന്നും പരിശോധിക്കില്ലെന്നതാണു കാംപയിനിന്റെ മറ്റൊരു പ്രത്യേകത.