കൊച്ചി: തദ്ദേശസ്ഥാപനങ്ങളിലേക്കുള്ള തിരഞ്ഞെടുപ്പിനുള്ള വോട്ടര്‍പട്ടിക തയ്യാറാക്കാന്‍ 2015-ലെ വോട്ടര്‍പട്ടിക വേണ്ടെന്ന് ഹൈക്കോടതി വിധിച്ചു. യു.ഡി.എഫിനുവേണ്ടി മുസ്ലിം ലീഗ് നാദാപുരം മണ്ഡലം പ്രസിഡന്റ് സൂപ്പി നരിക്കാട്ടേരി സമര്‍പ്പിച്ച ഹരജിയിലാണ് ഹൈക്കോടതി ഡിവിഷന്‍ ബെഞ്ചിന്റെ ഉത്തരവ്. ഇതോടെ പുതുതായി വോട്ടവകാശമുള്ള ആയിരങ്ങള്‍ക്ക് വരുന്ന തദ്ദേശ തിരഞ്ഞെടുപ്പില്‍ വോട്ടവകാശം രേഖപ്പെടുത്താനാകും. 2019 ലെ പട്ടിക അടിസ്ഥാനമാക്കിയാകണം തിരഞ്ഞെടുപ്പെന്നും കോടതി വിധിച്ചു.
ഈ കേസില്‍ നേരത്തെ സിംഗിള്‍ ബെഞ്ച് പുറപ്പെടുവിച്ച ഉത്തരവ് ഡിവിഷന്‍ ബെഞ്ച് റദ്ദാക്കുകയും ചെയ്തു.
2019-ലെ ലോക്സഭാ തിരഞ്ഞെടുപ്പിനു തയ്യാറാക്കിയ വോട്ടര്‍പട്ടിക അടിസ്ഥാനമാക്കി ഈ വര്‍ഷം അവസാനം നടക്കുന്ന തദ്ദേശതിരഞ്ഞെടുപ്പിനുള്ള വോട്ടര്‍പട്ടിക പുതുക്കണമെന്നായിരുന്നു ഹരജിയിലെ ആവശ്യം. മുസ്ലിം ലീഗ് നാദാപുരം മണ്ഡലം പ്രസിഡന്റ് സൂപ്പി നരിക്കാട്ടേരി നല്‍കിയ ഹരജി സിംഗിള്‍ബെഞ്ച് തള്ളിയിരുന്നു. ഇതിനെതിരേ നല്‍കിയ അപ്പീലാണ് ഡിവിഷന്‍ബെഞ്ച് പരിഗണിച്ച് വിധി പ്രസ്താവിച്ചത്.

2015-ലെ വോട്ടര്‍പട്ടിക അടിസ്ഥാനമാക്കുന്നതിനെതിരേ നല്‍കിയ അപ്പീലിലാണ് ചീഫ് ജസ്റ്റിസ് എസ്. മണികുമാറും ജസ്റ്റിസ് ഷാജി പി. ചാലിയും അടങ്ങിയ ഡിവിഷന്‍ബെഞ്ചിന്റെ ഉത്തരവ്. ഇക്കാര്യത്തില്‍ കോടതിക്ക് യുക്തമായ തീരുമാനമെടുക്കാമെന്ന് തിരഞ്ഞെടുപ്പ് കമ്മിഷന്‍ ബോധിപ്പിച്ചിരുന്നു. ഹരജിയില്‍ ഇന്ന് വിധിപറയാനായിരുന്നു കോടതി നിശ്ചയിച്ചിരുന്നത്. അതുപ്രകാരമാണ് കേസ് പരിശോധിച്ച ഡിവിഷന്‍ ബെഞ്ചിന്റെ ഉത്തരവ്.