തിരുവനന്തപുരം: ഹിന്ദു ഐ.എ.എസ് ഉദ്യോഗസ്ഥരുടെ പേരില്‍ വാട്‌സ് ആപ് ഗ്രൂപ്പുണ്ടാക്കിയത് വ്യവസായ വകുപ്പ് ഡയരക്ടര്‍ കെ ഗോപാലകൃഷ്ണന്റെ ഫോണ്ല്‍ നിന്ന് തന്നെയെന്ന് പൊലിസിന്റെ നിഗമനം. ഹാക്കിങ് നടന്നോ എന്ന ചോദ്യത്തിന് മെറ്റ വ്യക്തമായ മറുപടി നല്‍കിയിയിട്ടില്ല. കൂടുതല്‍ വിശദീകരണം തേടി പൊലിസ് വീണ്ടും മെറ്റയ്ക്കും ഗൂഗിളിനും കത്തയച്ചിട്ടുണ്ട്. 

ഗോപാല കൃഷ്ണന്‍ ഫോണ്‍ കൈമാറിയത് ഫോര്‍മാറ്റ് ചെയ്ത ശേഷമാണ്. ഫോണില്‍ നിന്നും വിശദാംശങ്ങളെടുക്കാന്‍ സൈബര്‍ പൊലീസിന് കഴിഞ്ഞിരുന്നില്ല. നാളെ ഫോണ്‍ ഫൊറന്‍സിക് പരിശോധനക്ക് നല്‍കും. 

വാട്‌സ് ആപ്പില്‍ ഗ്രൂപ്പ് തുടങ്ങിയത് സുഹൃത്തുകള്‍ പറഞ്ഞാണ് അറിഞ്ഞതെന്നും വിവരം അറിഞ്ഞയുടന്‍ ഡിലീറ്റ് ചെയതെന്നും കുറേ ഗ്രൂപ്പുകള്‍ ഫോണില്‍ തുടങ്ങിയിരുന്നതായി കണ്ടുവെന്നുമാണ് പ്രധാന മൊഴി. തന്റെ ഫോണ്‍ ഹാക്ക് ചെയ്യപ്പെട്ടുവെന്ന വാദം ആവര്‍ത്തിച്ച ഗോപാലകൃഷ്ണന്‍ എത്ര ഗ്രൂപ്പാണ് തുടങ്ങിയതെന്ന് മൊഴിയിലില്ല. ഡി.സി.പി ഭരത് റെഡ്ഡിയാണ് മൊഴിയെടുത്തത്. ഗോപാലകൃഷ്ണന്റെ സാംസങ് ഫോണും പൊലിസ് കസ്റ്റഡിയില്‍ വാങ്ങി പരിശോധിച്ചു.

മല്ലു ഹിന്ദു ഓഫിസേഴ്‌സ് എന്ന പേരിലാണ് കെ ഗോപാലകൃഷ്ണന്‍ അഡ്മിനായി മുതിര്‍ന്ന ഐ.എ.എസ് ഉദ്യോഗസ്ഥരുള്‍പ്പെടെയുള്ളവരുടെ ഗ്രൂപ്പുണ്ടാക്കിയത്.