തിരുവനന്തപുരം: അയല്‍പക്ക വിദ്യാലയ സംഗമത്തിന്റെ ഭാഗമായി തൈക്കാട് ഗവ.മോഡല്‍ ഹയര്‍ സെക്കന്‍ഡറി സ്‌കൂളില്‍ സംഘടിപ്പിച്ച ശാസ്ത്ര പ്രവൃത്തി പരിചയ ശില്‍പ്പശാല ശ്രദ്ധേയമായി. നഗരത്തിലെ വിവിധ ഗവ.എല്‍.പി.സ്‌കൂളിലെ അറുപതോളം നാലാം ക്ലാസ് വിദ്യാര്‍ഥികള്‍ മോഡല്‍ സ്‌കൂളിലെ സയന്‍സ് പാര്‍ക്കും ഗണിതലാബും സന്ദര്‍ശിച്ചു. സയന്‍സ് പാര്‍ക്കിലെ ശാസ്ത്ര പരീക്ഷണങ്ങള്‍ കുട്ടികള്‍ നേരിട്ട് ചെയ്തും കണ്ടും ശാസ്ത്രത്തിന്റെ വിവിധ അത്ഭുതങ്ങള്‍ അനുഭവിച്ചറിഞ്ഞു.സയന്‍സ് പാര്‍ക്കിലെ അത്ഭുത കിണര്‍ ,മാന്ത്രിക ബോള്‍, സൗര യൂഥം, മാന്ത്രിക പെന്‍ഡുലം , മാജിക് ലാമ്പ് തുടങ്ങിയ ശാസ്ത്ര കൗതുകങ്ങള്‍ കുട്ടികളെ ഏറെ ആകര്‍ഷിച്ചു. തുടര്‍ന്ന് പ്രവര്‍ത്തിപരിചയത്തിന്റെ ഭാഗമായി പേപ്പര്‍ കൊണ്ട് പൂക്കള്‍ ഉള്‍പ്പെടെയുള്ള അലങ്കാര വസ്തുക്കള്‍ ഉണ്ടാക്കാന്‍ പഠിപ്പിച്ചു . ഉച്ചക്ക് ശേഷം നടന്ന ശാസ്ത്ര ക്വിസ് കുട്ടികള്‍ക്ക് പുതിയ അറിവുകള്‍ നല്‍കി.