ഇരിട്ടി: പ്ലാസ്റ്റിക് ഉത്പന്നങ്ങളെ പോലെ  ഇ-മാലിന്യങ്ങളും മനുഷ്യനും പ്രകൃതിക്കും ആപത്തെന്ന് എ.ഡി.എം മുഹമ്മദ് യൂസഫ്. ഇരിട്ടി നഗരസഭയെ സമ്പൂര്‍ണ പ്ലാസ്റ്റിക് ക്യാരിബാഗ് മുക്ത നഗരസഭയായി പ്രഖ്യാപിക്കുന്ന ചടങ്ങ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. പ്ലാസ്റ്റിക് നിര്‍മാര്‍ജനത്തിനു പുറമെ ഇ-മാലിന്യവും സി.എഫ്.എല്‍, എല്‍.ഡി.എല്‍ മാലിന്യവും നിര്‍മാര്‍ജനം ചെയ്യുന്നതിനുള്ള നടപടിക്ക് തുടക്കം കുറിച്ചതായി അദ്ദേഹം പറഞ്ഞു. ഇത് സംബന്ധിച്ചുള്ള സര്‍ക്കാര്‍ ഉത്തരവ് ബന്ധപ്പെട്ട എല്ലാ ഓഫിസുകളിലേക്കും നല്‍കിയതായി അദ്ദേഹം അറിയിച്ചു. പ്ലാസ്റ്റിക്ക് ഉപയോഗത്തിന്റെ ഭീകരത മനസിലാക്കിയതിനെതുടര്‍ന്ന് പ്ലാസ്റ്റിക് ഇല്ലാത്ത ഒരു ജീവിതം ക്രമപ്പെടുത്തി വരുംതലമുറയെ രക്ഷിക്കുന്നതിന് സര്‍ക്കാര്‍ തന്നെ പ്ലാസ്റ്റിക്കിനെതിരെ യുദ്ധം പ്രഖ്യാപിച്ചിരിക്കുകയാണെന്നും ഈ സേവന പ്രവര്‍ത്തനത്തില്‍  മുഴുവന്‍ ജനങ്ങളും പങ്കാളികളാകണമെന്നും അദ്ദേഹം അഭ്യര്‍ഥിച്ചു. നഗരസഭ പൊതുജങ്ങള്‍ക്കും കച്ചവടക്കാര്‍ക്കും നല്‍കുന്നതിന് വേണ്ടി  നിര്‍മ്മിച്ച തുണി സഞ്ചിയുടെ വിതരണോദ്ഘാടനം ജില്ലാ ശുചിത്വ മിഷന്‍ കോര്‍ഡിനേറ്റര്‍  വി.കെ ദിലീപന് നല്‍കി കൊണ്ട് അദ്ദേഹം നിര്‍വഹിച്ചു. ജില്ലാ ഭരണകൂടത്തിന്റെ നിര്‍ദേശാനുസരണം ഇരിട്ടി നഗരസഭാ പ്രദേശത്ത്  പ്ലാസ്റ്റിക് ക്യാരിബാഗുകള്‍, തെര്‍മോകോള്‍ പ്ലേറ്റുകള്‍, കപ്പുകള്‍, ഡിസ്‌പോസിബിള്‍ ഗ്ലാസുകള്‍, എച്ച്.എം കവറുകള്‍ എന്നിവയാണ് നിരോധിച്ചത്. നിരോധന പ്രഖ്യാപനത്തിന് മുമ്പെ വിളംബര ജാഥയും നടത്തി. നഗരസഭ ചെയര്‍മാന്‍ പി.പി അശോകന്‍ അധ്യക്ഷനായി. സിനിമാ സംവിധായകന്‍ ഷെറി ഗോവിന്ദ് മുഖ്യപ്രഭാഷണം നടത്തി. ഹെല്‍ത്ത് ഇന്‍സ്‌പെക്ടര്‍ ഉസ്മാന്‍ ചാലിയാടന്‍ റിപ്പോര്‍ട്ട് അവതരിപ്പിച്ചു. പി.വി മോഹനന്‍, കെ സരസ്വതി, തോമസ് വര്‍ഗീസ്, കെ.കെ ദിവാകരന്‍, കെ ശ്രീധരന്‍, സി അബ്ദുല്ല, പി.കെ ജനാര്‍ദ്ദനന്‍, എം ബാബുരാജ്, കെ മുഹമ്മദലി, പി.കെ ഫാറൂക്ക്, ഇ.പി ശ്രീധരന്‍, റുബീന റഫീഖ്, ബില്‍ക്കീസ്, പി ശ്രീജിത്ത് സംസാരിച്ചു.