കല്‍പ്പറ്റ: മാവോയിസ്റ്റുകളുടെ സ്ഥിരം സാന്നിധ്യമുള്ള വയനാട്ടില്‍ വീണ്ടും മാവോയിസ്റ്റുകളുടെ ലഘുലേഖ സി.പി.ഐ മാവോയിസ്റ്റ് പശ്ചിമഘട്ട പ്രത്യേക സോണല്‍ കമ്മിറ്റിക്ക് വേണ്ടി വക്താവ് ജോഗിയുടെ പേരിലാണ് ലഘുലേഖ പ്രസിദ്ധീകരിച്ചിട്ടുള്ളത്.
ഫാസിസത്തിനെതിരേയുള്ള മാവോയിസ്റ്റുകളുടെ പോരാട്ടത്തില്‍ പൊതുജനങ്ങളുടെ സഹകരണം അഭ്യര്‍ഥിച്ചാണ് ലഘുലേഖ. വയനാട് പ്രസ് ക്ലബില്‍ പലതവണയായി ഇത്തരം ലഘുലേഖ എത്തിക്കാറുണ്ട്. ഇത്തവണ മാധ്യമ സുഹൃത്തുക്കളെ അഭിവാദ്യം ചെയ്തു കൊണ്ടുള്ള കുറിപ്പോട് കൂടിയാണ് ലഘുലേഖ എത്തിച്ചിട്ടുള്ളത്. ബ്രാഹ്മണ്യത്തിന് ഡൈനാമിറ്റ് വെക്കാന്‍ വര്‍ഗസമരത്തിന് തിരികൊളുത്തുക എന്ന തലക്കെട്ടില്‍ പ്രസിദ്ധീകരിച്ച ലഘുലേഖയില്‍ ഉടനീളം ബി.ജെ.പി, ആര്‍.എസ്.എസ്, സംഘപരിവാര്‍ സംഘടനകളെയാണ് ഉന്നം വെച്ചിട്ടുള്ളത്.
സര്‍ക്കാരിന്റെയും പൊലിസിന്റെയും സഹായമില്ലാതെ ശബരിമലയില്‍ ദര്‍ശനം നടത്തിയ ദളിത് വനിത കെ.സി മഞ്ജുവിന് അഭിവാദ്യങ്ങളോടെയാണ് രണ്ട് പുറമുള്ള ലഘുലേഖ അവസാനിക്കുന്നത്. രോഹിത് വെമൂലയുടെ മൂന്നാം ചരമ വാര്‍ഷിക ദിനത്തിലാണ് ഇത് പ്രസിദ്ധീകരിച്ചിട്ടുള്ളതെന്ന പ്രത്യേകത കൂടിയുണ്ട് ഈ ലഘുലേഖക്ക്. മാവോയിസ്റ്റുകളുടെ പേരില്‍ ആദിവാസികളെ വേട്ടയാടുന്ന ഭരണകൂടത്തെയും ലഘുലേഖ വിമര്‍ശിക്കുന്നുണ്ട്. കഴിഞ്ഞ കുറച്ച് ദിവസങ്ങളിലായി വയനാടിന്റെ വിവിധ ഭാഗങ്ങളില്‍ സാധാരണക്കാര്‍ക്ക് മാവോയിസ്റ്റുകളില്‍ നിന്ന് ഏല്‍ക്കേണ്ടി വന്ന അനിഷ്ട സംഭവങ്ങള്‍ ജനങ്ങളെ അവരില്‍ നിന്ന് അകറ്റുന്നതിന് കാരണമായെന്നും ലഘുലേഖയില്‍ പറയുന്നുണ്ട്.
ഇത്തരം പ്രവര്‍ത്തികളില്‍ ഏര്‍പ്പെട്ട ആളുകളെ തരംതാഴ്ത്തല്‍ അടക്കമുള്ള ശിക്ഷാനടപടികള്‍ക്ക് വിധേയമാക്കുമെന്നും ലഘുലേഖയില്‍ പറയുന്നുണ്ട്.