വാഴക്കാട്: നിയന്ത്രണം വിട്ട കാര്‍ തോട്ടിലേക്ക് മറിഞ്ഞ് യാത്രക്കാര്‍ അത്ഭുതകരമായി രക്ഷപ്പെട്ടു. തിങ്കളാഴ്ച രാവിലെ വാഴയൂര്‍ സാഫി കോളെജിനു സമീപമായിരുന്നു അപകടം. കോവൂര്‍ സ്വദേശികളായ ഡോ. ഇസ്മായില്‍, മകന്‍ ഇഷ്ഫാഖ് ഹബീബ് എന്നിവരായിരുന്നു കാറിലുണ്ടായിരുന്നത്. സാഫി കോളെജിലേക്കുള്ള റോഡിലെ വളവില്‍ വച്ച് നിയന്ത്രണം വിട്ട കാര്‍ സമീപത്തെ രണ്ടടി താഴ്ചയുള്ള തോട്ടിലേക്കാണ് മറിഞ്ഞത്. അപകടത്തില്‍ ഇരുവരും പോറലേല്‍ക്കാതെ അത്ഭുതകരമായി രക്ഷപ്പെടുകയായിരുന്നു. ഊര്‍ക്കടവ് ഭാഗത്ത് നിന്നും സാഫി കോളെജിലേക്ക് പോകും വഴിയായിരുന്നു അപകടം. പിന്നീട് രാമനാട്ടുകരയില്‍ നിന്ന് ക്രെയിനെത്തിച്ചാണ് കാര്‍ പുറത്തെടുത്തത്. അപകടത്തില്‍ കാര്‍ ഭാഗികമായി തകര്‍ന്നു.