തിരൂര്‍; സ്വകാര്യ ബസിന്റെ ടാങ്കില്‍നിന്ന് റോഡില്‍ ഓയില്‍ പരന്നൊഴുകി. ഇരുചക്രവാഹനങ്ങള്‍ തെന്നിവീണ് യാത്രക്കാര്‍ക്കു പരുക്കേറ്റു. തിരൂര്‍-പുറത്തൂര്‍ റൂട്ടിലോടുന്ന ബസിന്റെ ടാങ്കില്‍നിന്നാണ് നടുറോഡില്‍ ഓയില്‍ പരന്നൊഴുകിയത്. ഇന്നലെ ഉച്ചയ്ക്കായിരുന്നു സംഭവം.
വടക്കെ അങ്ങാടി മുതല്‍ ബി.പി അങ്ങാടിവരെയാണ് ബസില്‍നിന്ന് ഓയില്‍ ഒഴുകിയത്. ചമ്രവട്ടം സ്വദേശി വട്ടപറമ്പില്‍ മുസ്തഫ അടക്കം ആറു ബൈക്ക് യാത്രികര്‍ക്കാണ് പരുക്കേറ്റത്. പരുക്കേറ്റവരെ നാട്ടുകാര്‍ തിരൂര്‍ ജില്ലാ ആശുപത്രിയില്‍ എത്തിച്ചു. റോഡില്‍ പരന്നൊഴുകിയ ഓയില്‍ തിരൂര്‍ ഫയര്‍ഫോഴ്‌സ് യൂനിറ്റെത്തി വെള്ളം ചീറ്റിച്ചാണ് റോഡില്‍നിന്ന് ഒഴിവാക്കിയത്.