ന്യൂഡല്‍ഹി: റോഡ് മുടക്കിയുള്ള പ്രതിഷേധം അവസാനിപ്പിച്ച് യുക്തമായ മാര്‍ഗം കണ്ടെത്താന്‍ ഷഹീന്‍ബാഗിലെ സമരക്കാരോട് സുപ്രിം കോടതി. സമരം ചെയ്യരുതെന്ന് പറയുന്നില്ല എന്നാല്‍ അത് എങ്ങിനെയെന്നതാണ് പ്രശ്‌നമെന്നും കോടതി പറഞ്ഞു.

സമരം നടത്താന്‍ മറ്റൊരു സ്ഥലം ഡല്‍ഹി പൊലിസിന് നിര്‍ദ്ദേശിക്കാമെന്നും കോടതി ചൂണ്ടിക്കാട്ടി.

സമരക്കാരുമായി ചര്‍ച്ചക്ക് അഭിഭാഷകരെ നിയോഗിച്ചു. മുതിര്‍ന്ന അഭിഭാഷകനായ സഞ്ജയ് ഹെഗ്‌ഡെയെയും അഡ്വ. സാധന രാമചന്ദ്രനെയുമാണ് നിയോഗിച്ചത്.

'നിങ്ങള്‍ക്ക് പ്രതിഷേധിക്കാന്‍ അവകാശമുണ്ട്. എന്നാല്‍ റോഡുകള്‍ ബ്ലോക്ക് ചെയ്യരുത്. ഇത് പ്രശ്‌നങ്ങള്‍ സൃഷ്ടിക്കും. ഇന്ന് നിങ്ങള്‍ പ്രതിഷേധിക്കും. നാളെ മറ്റൊരു സംഘം പ്രതിഷേധിക്കും'- കോടതി ചൂണ്ടിക്കാട്ടി.

5000 ഷഹീന്‍ബാഗുകളുടരുമെന്ന ചന്ദ്രശേഖറിന്റെ പ്രഖ്യാപനം എടുത്തു കാണിച്ചായിരുന്നു ഹരജിക്കാരുടെ വാദം. എന്നാല്‍ ആ പരാമര്‍ശം കോടതി തള്ളി. '5000 പ്രതിഷേധങ്ങള്‍ ഉയരുന്നതില്‍ ഞങ്ങള്‍ക്ക് പ്രശ്‌നമില്ല. വഴി മുടക്കരുതെന്ന് മാത്രമാണ് ഞങ്ങളുടെ നിര്‍ദ്ദേശം. പ്രതിഷേധിക്കല്‍ മൗലികാവകാശമാണെന്നും കോടതി ചൂണ്ടിക്കാട്ടി.