കൊച്ചി: നെടുങ്കണ്ടം രാജ്കുമാര്‍ കസ്റ്റഡി മരണക്കേസില്‍ ആറു പേര്‍ കൂടി അറസ്റ്റില്‍. അഞ്ചു പൊലിസുകാരും ഒരു ഹോംഗാര്‍ഡുമാണ് പിടിയിലായത്. എ.എസ്.ഐ റെജിമോന്‍, ഡ്രൈവര്‍മാരായ പി.സി. നിയാസ്, സജീവ് ആന്റണി, ഹോം ഗാര്‍ഡ് ജെയിംസ്, സി.പി.ഒ ജിതിന്‍ കെ. ജോര്‍ജ്, എ.എസ്.ഐ റോയ് പി. വര്‍ഗീസ് എന്നിവരെയാണ് അറസ്റ്റ് ചെയ്തത്. കൊച്ചി ഓഫിസിലേക്ക് വിളിച്ചുവരുത്തിയാണ് ഇവരുടെ അറസ്റ്റ് രേഖപ്പെടുത്തിയത്.

ഹൈക്കോടതി അനുവദിച്ച ജാമ്യം സുപ്രിംകോടതി റദ്ദാക്കിയതിനെ തുടര്‍ന്ന് കേസിലെ മുഖ്യപ്രതി എസ്.ഐ സാബുവിനെ സി.ബി.ഐ തിങ്കളാഴ്ച അറസ്റ്റ് ചെയ്തിരുന്നു. ഇതിനു പിന്നാലെയാണ് മറ്റ് പൊലിസുകാരുടെ അറസ്റ്റ്.

കഴിഞ്ഞ വര്‍ഷം ജൂണ്‍ 21നാണ് വാഗമണ്‍ സ്വദേശിയായ രാജ് കുമാര്‍ പീരുമേട് സബ് ജയിലില്‍ റിമാന്റില്‍ കഴിയവെ മരിച്ചത്. പൊലിസ് കസ്റ്റഡിയില്‍ ഇരിക്കവെ രാജ് കുമാര്‍ ക്രൂരമര്‍ദനത്തിന് ഇരയായെന്ന് പോസ്റ്റുമോര്‍ട്ടത്തില്‍ കണ്ടെത്തിയിരുന്നു. ഉരുട്ടിക്കൊലയാണെന്ന ആരോപണവും ഉയര്‍ന്നു.