തിരുവനന്തപുരം: സെക്രട്ടറിയേറ്റിനു മുന്നിലെ ഷഹീന്‍ബാഗ് അനുകൂല സമരപന്തല്‍ പൊളിച്ചുമാറ്റണമെന്ന് പൊലിസ്. ഇക്കാര്യം ആവശ്യപ്പെട്ട് പൊലിസ് പന്തലുടമയ്ക്ക് നോട്ടിസ് അയച്ചു. സെക്രട്ടേറിയേറ്റിന് മുന്നില്‍ സഞ്ചാര സ്വാതന്ത്ര്യം നിഷേധിച്ച് കൊണ്ട് സമരം നടത്തരുതെന്ന ഹൈക്കോടതിയുടെ മുന്‍ ഉത്തരവ് ചൂണ്ടിക്കാട്ടിയാണ് സമരം അവസാനിപ്പിക്കാന്‍ നിര്‍ദ്ദേശം നല്‍കിയിരിക്കുന്നത്.

എന്നാല്‍ പന്തലുപൊളിക്കാന്‍ അനുവദിക്കില്ലെന്നാണ് സമരക്കാരുടെ പക്ഷം. 12 മണിക്കൂറിനുള്ളില്‍ സമരം അവസാനിപ്പിക്കണമെന്നാണു പന്തലുടമയ്ക്കു നല്‍കിയിരിക്കുന്ന നോട്ടീസ്.

എവയ്ക്ക് എന്ന വാട്ട്സ്ആപ്പ് കൂട്ടായ്മയുടെ ആഭിമുഖ്യത്തിലാണ് തലസ്ഥാനത്ത് ഷഹീന്‍ബാഗ് മോഡല്‍ സമരം ആരംഭിച്ചത്. മുന്‍മുഖ്യമന്ത്രി ഉമ്മന്‍ചാണ്ടി, സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍, വി.എം സുധീരന്‍, എം.കെ മുനീര്‍ തുടങ്ങി നിരവധിപേര്‍ ഇതിനോടകം സമരപ്പന്തലിലെത്തി ഐക്യദാര്‍ഢ്യം പ്രഖ്യാപിച്ചിട്ടുണ്ട്.