കൊച്ചി: നെടുങ്കണ്ടം രാജ്കുമാര്‍ കസ്റ്റഡി മരണക്കേസില്‍ ആറുപേര്‍കൂടി അറസ്റ്റിലായി. അഞ്ച് പൊലിസുകാരെയും ഒരു ഹോം ഗാര്‍ഡിനെയുമാണ് ഇന്നലെ സി.ബി.ഐ അറസ്റ്റുചെയ്ത്. എ.എസ്.ഐമാരായ സി.ബി റെജിമോന്‍, റോയ്.പി.വര്‍ഗീസ്, സിവില്‍ പൊലിസ് ഓഫിസര്‍മാരായ എസ്.നിയാസ്, സജീവ് ആന്റണി, ജിതിന്‍.കെ.ജോര്‍ജ്, ഹോം ഗാര്‍ഡ് കെ.എം ജെയിംസ് എന്നിവരാണ് അറസ്റ്റിലായത്.
കൊച്ചിയിലെ സി.ബി.ഐ ഓഫിസില്‍ വിളിച്ചുവരുത്തിയായിരുന്നു അറസ്റ്റ്. ഇവരെ എറണാകുളം സി.ജെ.എം കോടതിയില്‍ ഹാജരാക്കി. കേസിലെ മുഖ്യപ്രതി എസ്.ഐ സാബുവിനെ കഴിഞ്ഞദിവസം സി.ബി.ഐ അറസ്റ്റുചെയ്തിരുന്നു. ഹൈക്കോടതി അനുവദിച്ച ജാമ്യം സുപ്രിംകോടതി റദ്ദാക്കിയതിനെ തുടര്‍ന്നായിരുന്നു അറസ്റ്റ്.
അതേസമയം കേസില്‍ ഉന്നത ഉദ്യോഗസ്ഥരും ഉള്‍പ്പെട്ടതായാണ് സൂചന. സാബുവിനെ ചോദ്യം ചെയ്തില്‍ നിന്നും ഇത് സംബന്ധിച്ച് സി.ബി.ഐയ്ക്ക് വിവരം ലഭിച്ചിട്ടുണ്ട്. ഇന്നലെ അറസ്റ്റുചെയ്തവരെ വിശദമായി ചോദ്യം ചെയ്യുന്നതോടെ ഇതുസംബന്ധിച്ച് കൂടുതല്‍ വിവരം ലഭിക്കുമെന്ന കണക്കുകൂട്ടലിലാണ് സി.ബി.ഐ.