കല്യാശ്ശേരി: തിരക്കേറിയ ഇരിണാവ് റോഡ് കവലയില്‍ ബസ് കാത്തിരിപ്പ് കേന്ദ്രങ്ങള്‍ ഇല്ലാത്തതിനാല്‍ യാത്രക്കാര്‍ വലയുന്നു.
പരിഷ്‌കരിച്ച കെ.എസ്.ടി.പി റോഡില്‍ ഇരുഭാഗത്തും ബസ് ബേകള്‍ ഉണ്ടെങ്കിലും യാത്രക്കാര്‍ക്കു കാത്തുനില്‍ക്കാന്‍ ഇടമില്ല. വേനല്‍ വെയിലില്‍ യാതൊരു തണലുമില്ലാതെ നൂറുകണക്കിന് വിദ്യാര്‍ഥികള്‍ അടക്കമുള്ളവരാണ് എന്നും ഇരിണാവ് റോഡ് കവലയില്‍ ദുരിതം പേറുന്നത്.
ഇവിടെ നിര്‍മിച്ച ബസ് ബേകളില്‍ പലപ്പോഴും അനധികൃതമായി വാഹനങ്ങള്‍ പാര്‍ക്കിങ്ങിന് ഉപയോഗിക്കുന്നതും യാത്രക്കാര്‍ക്കു വിനയായിട്ടുണ്ട്.കെ.എസ്.ടി.പി അധികൃതര്‍ നവീകരിച്ച റോഡില്‍ ചില സ്ഥലങ്ങളില്‍ ബസ് കാത്തിരിപ്പ് കേന്ദ്രങ്ങള്‍ നിര്‍മിച്ചെങ്കിലും പാപ്പിനിശ്ശേരിയിലടക്കുള്ളതു യാത്രക്കാര്‍ക്ക് ഉപകരിക്കാത്ത സ്ഥലങ്ങളിലാണുള്ളത്.