ന്യൂഡല്‍ഹി: പ്രവാസികള്‍ക്ക് വോട്ടവകാശം സംബന്ധിച്ച കേസില്‍ ഏപ്രിലില്‍ അന്തിമ വാദം കേള്‍ക്കാമെന്ന് സുപ്രിംകോടതി. മലയാളി വ്യവസായി ഡോ.ഷംസീര്‍ വയലില്‍ നല്‍കിയ ഹരജി പരിഗണിക്കവെയാണ് ജസ്റ്റിസുമാരായ ദീപക് ഗുപ്തയും അനിരുദ്ധ ബോസും അടങ്ങുന്ന ബെഞ്ച് ഇക്കാര്യം വ്യക്തമാക്കിയത്. പ്രവാസി വോട്ടവകാശം ഉറപ്പാക്കാന്‍ കേന്ദ്രസര്‍ക്കാര്‍ 2018 ആഗസ്റ്റില്‍ ലോക്സഭയില്‍ ബില്ല് കൊണ്ടുവന്നിരുന്നു. എന്നാല്‍ ബില്ല് രാജ്യസഭ പാസാക്കാത്തതിനാല്‍ ബില്ല് അസാധുവായി. ഇക്കാര്യം ഇന്നലെ ഹരജിക്കാരനുവേണ്ടി ഹാജരായ അഭിഭാഷകന്‍ ഹാരിസ് ബീരാന്‍ കോടതിയില്‍ ചൂണ്ടിക്കാട്ടി.
ഇതേത്തുടര്‍ന്നാണ് ഏപ്രിലില്‍ അന്തിമ വാദം കേട്ട് വിധി പറയാമെന്ന് കോടതി അറിയിച്ചത്.
2014ലാണ് പ്രവാസി ഇന്ത്യക്കാര്‍ക്ക് വോട്ടവകാശം ഉറപ്പുവരുത്തുന്നതിന് നിര്‍ദേശം നല്‍കണമെന്നാവശ്യപ്പെട്ട് ഷംസീര്‍ വയലില്‍ സുപ്രീം കോടതിയെ സമീപിച്ചത്. തുടര്‍ന്ന് ജനപ്രാതിനിധ്യ നിയമത്തില്‍ ഭേദഗതി കൊണ്ടുവരുമെന്നു കേന്ദ്രസര്‍ക്കാര്‍ സുപ്രീംകോടതിയില്‍ സത്യവാങ്മൂലം നല്‍കിയിരുന്നു. വിദേശ രാജ്യങ്ങളിലെ ഇന്ത്യക്കാര്‍ക്ക് തങ്ങളുടെ പ്രതിനിധിയെ ഉപയോഗിച്ച് നാട്ടില്‍ പ്രോക്സി വോട്ട് ചെയ്യാമെന്നായിരുന്നു കേന്ദ്രം വ്യക്തമാക്കിയിരുന്നത്. എന്നാല്‍ കേന്ദ്രത്തിന്റെ വാഗ്ദാനം ഇതുവരെ നടപ്പായില്ലെന്നു ഹരജിക്കാര്‍ കോടതിയില്‍ വ്യക്തമാക്കി.