മാവേലിക്കര: പാതയോരത്തെ മുഴുവന്‍ മദ്യ വില്‍പ്പനശാലകളും അടച്ചുപൂട്ടണമെന്ന സുപ്രീംകോടതി ഉത്തരവ് സര്‍ക്കാര്‍ അതേപടി നടപ്പിലാക്കണമെന്ന് മദ്യ വിരുദ്ധ ജനകീയ മുന്നണി സംസ്ഥാന ചെയര്‍മാന്‍ ബിഷപ്പ് ഡോ ജോഷ്വാ മാര്‍ ഇഗ്‌നാത്തിയോസ് ആവശ്യപ്പെട്ടു.
പൊതുജനങ്ങളുടെ ആരോഗ്യ സുരക്ഷ സര്‍ക്കാരിന്റ്റെ കടമയാണ്.സുപ്രീം കോടതി വിധി ചില്ലറവില്‍പ്പനശാലകള്‍ക്ക് മാത്രമേ ബാധകമാകുകയുള്ളൂ എന്നും ബാറുകള്‍ക്ക് ബാധകമല്ലന്നുമുള്ള അറ്റോര്‍ണി ജനറലിന്റെ നിയമോപദേശത്തെ സര്‍ക്കാര്‍ വിവേകത്തോടെ പ്രതികരിക്കണമെന്നും അദ്ദേഹം ആവശ്യപ്പെട്ടു.
ബാറുടമകളെ സഹായിക്കുകയും,കുടിവെള്ളക്ഷാമവും,റേഷന്‍ സാധനങ്ങളുടെ അപര്യാപ്തതയും മൂലം ദുരിതം അനുഭവിക്കുന്ന ജനങ്ങളെ അവഗണിക്കുകയും ചെയ്യുന്ന സര്‍ക്കാര്‍ നടപടി അപലനീയമാണ്.മദ്യ ലഭ്യതകുറവ് മൂലം ടൂറിസം മേഖലയില്‍ മാന്ദ്യം സംഭവിച്ചെന്ന പ്രചാരണം അടിസ്ഥാന രഹിതമാണന്നും പൗരന്മാരുടെ ജീവനും സ്വത്തിനും കാവലാളാകേണ്ട ഭരണകൂടം ജനപക്ഷത്ത് നിന്ന് നയരൂപീകരണം നടത്തണമെന്നും ഡോ ജോഷ്വാ മാര്‍ ഇഗ്‌നാത്തിയോസ് ആവശ്യപ്പെട്ടു.