പെരുമ്പാവൂര്‍: നിയന്ത്രണം വിട്ട് പെയിന്റുമായി പോയ മിനിലോറി തലകീഴായി മറിഞ്ഞു. എം.എസി റോഡ് കീഴില്ലം പാറേത്തുമുകള്‍ പള്ളിക്ക് സമീപം ഇന്നലെ രാവിലെ 7.30 ഓടെയാണ് സംഭവം. മുവാറ്റപുഴ ഭാഗത്ത് നിന്നും പെയിന്റുമായി പെരുമ്പാവൂര്‍ ഭാഗത്തേക്ക് വരികയായിരുന്ന മിനി ലോറി നിയന്ത്രണം വിട്ട് റോഡില്‍ തലകീഴായി മറിയുകയായിരുന്നു. വാഹനം ഓടിച്ചിരുന്ന പോഞ്ഞാശ്ശേരി സ്വദേശി ജിജേഷ് (25) നിസാര പരിക്കുകളോടെ അത്ഭുതകരമായി രക്ഷപ്പെട്ടു. ലോറി മറിഞ്ഞതിനെ തുടര്‍ന്ന് റോഡിലേക്ക് പെയിന്റ് പാത്രങ്ങള്‍ പൊട്ടിചിതറി റോഡിലൊഴുകി. തുടര്‍ന്ന് പെരുമ്പാവൂരില്‍ നിന്നും ഫയര്‍ ഫോഴ്‌സെത്തി ഒരു മണിക്കൂറോളം നീണ്ട പരിശ്രമത്തിനൊടുവിലാണ് റോഡില്‍ നിന്നും പെയിന്റ് നീക്കി ഗതാഗത യോഗ്യമാക്കിയത്.