കാലടി: വിവിധ കേസുകളില്‍ രണ്ട് പേരെ കാലടി പൊലിസ് അറസ്റ്റു ചെയ്തു. കാലടി സനല്‍ കൊലപാതകം, മലയാറ്റൂര്‍ കാടപ്പാറയില്‍ കല്യാണ വീട്ടിലെ വധശ്രമം എന്നീ കേസുകളിലെ പ്രതികളെയാണ് പിടികൂടിയിരിക്കുന്നത്. കല്യാണ വീട്ടിലെ വധശ്രമക്കേസില്‍ പ്രായപൂര്‍ത്തിയാകാത്തയാളെയാണ് അറസ്റ്റു ചെയ്തിരിക്കുന്നത്. സനല്‍ വധശ്രമക്കേസില്‍ മുഖ്യ പ്രതികള്‍ക്ക് സഹായം ചെയ്തു നല്‍കിയ മഞ്ഞപ്ര സെബിപുരം എടാട്ടുകാരന്‍ ജോമോനാണ് (22)പിടിയലായത്.
സനലിനെ വെട്ടിയ മുഖ്യ പ്രതികളായ കാര രതീഷ്, ഗ്രിന്റെഷ്, എല്‍ദോ,ടോണി എന്നിവര്‍ക്ക് സനലിന്റെ സ്ഥലം പറഞ്ഞു കൊടുത്തത് ജോമോനാണ്. ഇന്നോവ കാറില്‍ സഞ്ചരിച്ചാണ് പ്രതി ഇവര്‍ക്ക് നിര്‍ദ്ദേശങ്ങള്‍ നല്‍കിക്കൊണ്ടിരുന്നത്.
കൊലപാതകത്തിനു ശേഷം ഇയാള്‍ സംസ്ഥാനം വിട്ടു പോകുകയും ചെയ്തു. പൊലിസിന് കിട്ടിയ രഹസ്യവിവരത്തെ തുടര്‍ന്ന് ഗുജറാത്തില്‍ നിന്നുമാണ് പ്രതി പിടിയിലാകുന്നത്.
സെപ്റ്റംബര്‍ 11 ന് കല്ല്യാണ വീട്ടില്‍ വച്ച് റിതിന്‍ രാജനെയാണ് കത്തി കൊണ്ട് കുത്തിയും കമ്പിവടിക്ക് അടിച്ചുമാണ് കൊലപ്പെടുത്താന്‍ ശ്രമിച്ചത്. കേസില്‍ എട്ട് പേരെ പൊലിസ് അറസ്റ്റു ചെയ്തിട്ടുണ്ട്.