കോഴിക്കോട്: വികസനത്തിന്റെ പേരിലാണ് ജനപ്രതിനിധികളെ വിലയിരുത്തുന്നതെന്ന് മുന്‍ ചീഫ് സെക്രട്ടറി ഡോ. ഡി. ബാബുപോള്‍ ഐ.എ.എസ്. എം.കെ രാഘവന്‍ എം.പിക്ക് കോഴിക്കോട് പൗരാവലി നല്‍കിയ സ്വീകരണം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. തെരഞ്ഞെടുപ്പിനു മുന്‍പും അടുത്ത തെരഞ്ഞെടുപ്പ് പ്രഖ്യാപനം വരുന്നതു വരെയുമുള്ള രണ്ട് ധ്രുവങ്ങള്‍ക്കിടയിലാണ് ജനാധിപത്യമെന്നും അദ്ദേഹം അഭിപ്രായപ്പെട്ടു.
ഒരു രാഷ്ട്രീയക്കാരനെയും പ്രത്യേക കാരണങ്ങള്‍ ചൂണ്ടിക്കാണിച്ച് വിലയിരുത്താനാകില്ല. രാജ്യത്തെ രാഷ്ട്രീയ മേഖലയുടെ സുതാര്യതയും സത്യസന്ധതയും നഷ്ടപ്പെടുകയാണ്. രാഷ്ട്രീയത്തെ പാര്‍ട്ടികള്‍ക്കതീതമായാണ് വിലയിരുത്തപ്പെടുന്നത്. ജനാധിപത്യത്തെക്കാള്‍ ഭേദപ്പെട്ട മറ്റൊരു സംവിധാനമില്ലാത്തതിനാലാണ് നമ്മള്‍ അതില്‍ വിശ്വസിക്കുന്നതെന്നും ബാബുപോള്‍ കൂട്ടിച്ചേര്‍ത്തു. സ്വാഗതസംഘം ചെയര്‍മാന്‍ ഷെവലിയാര്‍ സി.ഇ ചാക്കുണ്ണി അധ്യക്ഷനായി. ഡോ. എം.ജി.എസ് നാരായണന്‍ മുഖ്യപ്രഭാഷണം നടത്തി. കോഴിക്കോട് രൂപത വികാരി ജനറല്‍ റവ. തോമസ് പനയ്ക്കല്‍ പൊന്നാട അണിയിച്ചു. കോഴിക്കോട് മുഖ്യ ഖാസി കെ.വി ഇമ്പിച്ചഹമ്മദ് ഹാജി ഉപഹാര സമര്‍പ്പണം നടത്തി. എം.ആര്‍ രാജേഷ് മംഗളപത്രം സമര്‍പ്പിച്ചു. പി. ദാമോദരന്‍, എം.വി കുഞ്ഞാമു, ഡോ. പി.എ ലളിത, എ. ശ്യാംസുന്ദര്‍, സുബൈര്‍ കൊളക്കാടന്‍, ഡോ. സി. രവീന്ദ്രന്‍ സംസാരിച്ചു. വിവേക് ഡി. ഷേണായ് സ്വാഗതവും സി. മാധവദാസ് നന്ദിയും പറഞ്ഞു.