കൊല്ലം: ആദ്യ വിവാഹം നിയമപരമായി നിലനില്‍ക്കേ രണ്ടാമതും വിവാഹിതനായ സി.പി.എം നേതാവിനെ പാര്‍ട്ടിയില്‍ നിന്ന് പുറത്താക്കി. ഡി.വൈ.എഫ്.ഐ മുന്‍ ജില്ലാ പ്രസിഡന്റും പത്തനാപുരം ബ്ലോക്ക് പഞ്ചായത്ത് മുന്‍ അധ്യക്ഷനുമായ സജീഷിനെതിരെയാണ് പാര്‍ട്ടി പുറത്താക്കിയത്.
ആറ് മാസം മുന്‍പ് കുടുംബ പ്രശ്‌നങ്ങളുടെ പേരില്‍ പത്തനാപുരം ബ്ലോക്ക് പഞ്ചായത്ത് അധ്യക്ഷ സ്ഥാനം സജീഷ് രാജിവച്ചിരുന്നു. പ്രശ്‌നങ്ങള്‍ ഉടന്‍ പരിഹരിക്കണമെന്ന് അന്ന് പാര്‍ട്ടി നേതൃത്വം മുന്നറിയിപ്പും നല്‍കിയിരുന്നു. എന്നാല്‍ വിവാഹ മോചനം നേടാതെ വീണ്ടും വിവാഹം കഴിച്ചതോടെയാണ് ഇയാളെ പുറത്താക്കാന്‍ പാര്‍ട്ടി നിര്‍ബന്ധിതരായത്.

വിവാഹ മോചനം നേടാതെ തെറ്റിദ്ധരിപ്പിച്ച് സജീഷ് വീണ്ടും വിവാഹം കഴിച്ചുവെന്നു ആദ്യ ഭാര്യ ജില്ലാ രജിസ്ട്രാര്‍ക്കു പരാതി നല്‍കിയിരുന്നു. സി.പി.എമ്മിനും പരാതി കൈമാറി. ഇതേ തുടര്‍ന്നാണ് പാര്‍ട്ടി നടപടിയെടുക്കാന്‍ നിര്‍ബന്ധിതനായത്. സജീഷ് രണ്ടാമത് രജിസ്റ്റര്‍ വിവാഹം ചെയ്തത് കിളിമാനൂര്‍ സ്വദേശിയെയാണ്. പരാതിയുടെ അടിസ്ഥാനത്തില്‍ പാര്‍ട്ടി ചുമതലകളില്‍ നിന്ന് സജീഷിനെ നേരത്തെ തന്നെ മാറ്റി നിര്‍ത്തിയിരുന്നുവെന്നാണ് പാര്‍ട്ടിയുടെ വിശദീകരണം.