ന്യൂഡല്‍ഹി: 2019 ല്‍ പാസാക്കിയ മുത്വലാഖ് നിയമത്തിനെതിരെ വനിതാ ലീഗ് സുപ്രിംകോടതിയില്‍. മുത്വലാഖ് ക്രിമിനല്‍ കുറ്റമാക്കുന്ന നിയമം അത്യന്തം സ്ത്രീവിരുദ്ധവും കുടുംബബന്ധങ്ങള്‍ക്ക് എതിരുമാണ് എന്നാരോപിച്ചാണ് സുപ്രിം കോടതിയെ സമീപിച്ചത്. വനിതാ ലീഗിന്റെ അഖിലേന്ത്യാ ജനറല്‍ സെക്രട്ടറി നൂര്‍ബിന റഷീദ് ആണ് സുപ്രിംകോടതിയില്‍ റിട്ട് ഹര്‍ജി ഫയല്‍ ചെയ്തിരിക്കുന്നത്.

മുത്വലാഖ് ചൊല്ലിയതിന്റെ പേരില്‍ ക്രിമിനല്‍ കുറ്റം ചുമത്തിയാല്‍ ഭര്‍ത്താവിനെ ജയിലില്‍ അടയ്ക്കുന്നത് ഭാര്യയെയും കുട്ടികളെയും അനാഥമാക്കും. വിവാഹത്തിലെ തര്‍ക്കം ഏതെങ്കിലും തരത്തില്‍ ഒത്ത് തീര്‍ക്കാന്‍ സാധ്യത ഉണ്ടെങ്കിലും ഈ നിയമത്തോടെ അത് പൂര്‍ണ്ണമായും അവസാനിക്കുമെന്നും നൂര്‍ബിന റഷീദ് തന്റെ ഹര്‍ജിയില്‍ ചൂണ്ടിക്കാട്ടുന്നു. നൂര്‍ബിന റഷീദിന് വേണ്ടി അഭിഭാഷകന്‍ ആയ സുള്‍ഫിക്കര്‍ അലി ആണ് റിട്ട് ഹര്‍ജി ഫയല്‍ ചെയ്തിരിക്കുന്നത്.

മുത്വലാഖ് ക്രിമിനല്‍ കുറ്റം ആക്കുന്ന നിയമം ചോദ്യംചെയ്ത് സമസ്ത കേരള ജംഇയ്യത്തുല്‍ ഉലമ നല്‍കിയ വിവിധ ഹരജികളില്‍ സുപ്രിംകോടതി നേരത്തെ കേന്ദ്ര സര്‍ക്കാരിന് നോട്ടീസ് അയച്ചിരുന്നു. എന്നാല്‍ കേന്ദ്ര സര്‍ക്കാര്‍ ഇതുവരെയും മറുപടി നല്‍കിയിട്ടില്ല.