ബംഗളൂരു: അധോലോക കുറ്റവാളി രവി പൂജാരിയെ തിങ്കളാഴ്ച രാവിലെ സെനഗലില്‍ നിന്ന് ഇന്ത്യയില്‍ എത്തിച്ചു. കര്‍ണാടകയില്‍ നിന്നുള്ള പൊലിസ് സംഘവും റോ ഉദ്യോഗസ്ഥരും ചേര്‍ന്ന് ബംഗളൂരുവിലേക്കാണ് ഇയാളെ കൊണ്ടുവന്നത്. അമര്‍ കുമാര്‍ പാണ്ഡെയുടെ നേതൃത്വത്തില്‍ ബെംഗളൂരു പൊലിസും മംഗളൂരു പൊലിസും ചേര്‍ന്നാണ് ഇയാളെ എത്തിച്ചത്.

ബംഗളൂരുവിലെ മാഡിവാളയിലെ ചോദ്യം ചെയ്യല്‍ കേന്ദ്രത്തിലേക്ക് കൊണ്ടുപോയ ഇയാളെ ഇന്ന് കോടതിയില്‍ ഹാജരാക്കും. നാല്‍പതോളം കൊലപാതക കേസുകള്‍, കൊള്ളയടിക്കല്‍ കേസുകള്‍ എന്നിവയില്‍ മോസ്റ്റ് വാണ്ടഡ് പ്രതിയാണ് രവി പൂജാരി.

കര്‍ണാടകയില്‍ മാത്രം 166 കേസുകളാണ് രവി പൂജാരിക്കെതിരെ ഉള്ളത്. കൊച്ചിയില്‍ നടി ലീന മരിയ പോളിന്റെ ബ്യൂട്ടി പാര്‍ലര്‍ ആക്രമിച്ച കേസില്‍ രവി പൂജാരി മുഖ്യപ്രതിയാണ്. അന്വേഷണത്തിന്റെ ഭാഗമായി ഇയാളെ കൊച്ചിയിലും കൊണ്ടുവരും.