ശ്രീനഗര്‍: ജമ്മുകാശ്മീരില്‍ തീവ്രവാദികളുമായുള്ള ഏറ്റുമുട്ടലില്‍ പൊലിസ് കോണ്‍സ്റ്റബിള്‍ കൊല്ലപ്പെട്ടു. രണ്ടു തീവ്രവാദികളും കൊല്ലപ്പെട്ടിട്ടുണ്ട്. പുല്‍വാമ ജില്ലയിലെ ട്രാല്‍ പട്ടണത്തില്‍ ശനിയാഴ്ച രാത്രിയാണ് സംഭവം. കോണ്‍സ്റ്റബിള്‍ മന്‍സൂര്‍ അഹമദാണ് കൊല്ലപ്പെട്ടത്. മൂന്ന് പേര്‍ക്ക് പരുക്കേറ്റു. ശനിയാഴ്ച വൈകീട്ട് തുടങ്ങിയ ഏറ്റുമുട്ടല്‍ ഞായറാഴ്ച രാവിലെയാണ് അവസാനിച്ചത്.
ഹയുന ഗ്രാമത്തിലെ ഒരു വീട്ടില്‍ ഹിസ്ബുള്‍ മുജാഹിദീന്‍ കമാന്‍ഡോകള്‍ ഒളിച്ചിരിക്കുന്നുവെന്ന വിവരത്തെ തുടര്‍ന്ന് സൈന്യവും പൊലിസും ചേര്‍ന്ന് നടത്തിയ തെരച്ചിലിനിടെയാണ് തീവ്രവാദികള്‍ വെടിയുതിര്‍ക്കുകയായിരുന്നു. തുടര്‍ന്ന് സൈന്യം പ്രത്യാക്രമണം നടത്തുകയും ഇരുവിഭാഗങ്ങളും തമ്മില്‍ രൂക്ഷമായ പോരാട്ടം നടക്കുകയും ചെയ്തു. ഏറ്റുമുട്ടലിനിടെയാണ് മന്‍സൂര്‍ അഹമദ് കൊല്ലപ്പെട്ടത്.