ഇംഗ്ലീഷ് ലീഗ് കപ്പില്‍ ചെല്‍സിയും ടോട്ടന്‍ഹാമും തമ്മിലുള്ള മത്സരത്തില്‍ പിറന്നത് ചരിത്രമുഹൂര്‍ത്തം. 27ാം മിനുറ്റിലാണ് ഫുട്‌ബോള്‍ ലോകത്തെ അമ്പരിപ്പിച്ച ഗോള്‍ പിറന്നത്. ചെല്‍സിയന്‍ താരം നിഗോളോ കാന്റെ കാലില്‍ നിന്നാണ് ഗോളിന്റെ പിറവി. കോര്‍ണര്‍ കിക്കില്‍ നിന്നാണ് ഗോളിന്റെ തുടക്കം.

ചെല്‍സിയക്കു ലഭിച്ച കോര്‍ണര്‍ കിക്കെടുത്ത ഹസാര്‍ഡ് ബോള്‍ ഗോള്‍ പോസ്റ്റ് ലക്ഷ്യമാക്കി അടിച്ചുവെങ്കിലും ടോട്ടന്‍ഹാമിന്റെ പ്രതിരോധത്തില്‍ തട്ടി പെനാല്‍റ്റി ബോക്‌സിന് പുറത്തേക്ക്. പുറത്തു കാത്തിരുന്ന നിഗോളോ കാന്റെ കാലിലേക്ക്. കാന്റെ കാലിലേക്ക് പന്തെത്തിയത് മാത്രമേ ടോട്ടന്‍ഹാം താരങ്ങള്‍ക്ക് ഓര്‍മയുള്ളൂ. വെടിച്ചില്ല് കണക്കേ പന്ത് ടോട്ടന്‍ഹാം വല കുലുക്കി.

ഇതിലേറ്റവും രസകരം മൂന്ന് താരങ്ങളുടെ കാലിനിടയിലൂടെയാണ് കാന്റെ പന്ത് പോസ്റ്റിലേക്ക് മൂളിപ്പായിച്ചതെന്നാണ്. അടി തടുക്കാനെത്തിയ ബെന്‍ ഡേവിസിന്റെ കാലിനിടയിലൂടെ പോയ പന്ത് മൂസ സിസോക്കോയുടെയുംഅവസാനം ഗോള്‍കീപ്പര്‍ പോളോ ഗാസിങ്ങയുടെ കാലിനിടയിലൂടെയാണ് പന്ത് വലയില്‍ ചുംബിച്ചത്.

ഗോളിനെ ഏറ്റെടുത്തിരിക്കുകയാണ് ആരാധകര്‍. ഏര്‌റവും അമ്പരപ്പുള്ള ഗോളുകള്‍ക്കായി മ്യൂസിയം പണിയുന്നുണ്ടെങ്കില്‍ അതിലേക്ക് കാന്റെ ഗോളും നല്‍കണമെന്നാണ് ആരാധകപക്ഷം. മത്സരത്തില്‍ 27ാം മിനുറ്റില്‍ നിഗോളോ കാന്റെയും 38ാം മിനുറ്റില്‍ എഡ്വിന്‍ ഹസാര്‍ഡും ചെല്‍സിക്കായി ലക്ഷ്യം കണ്ടപ്പോള്‍ 50ാം മിനുറ്റില്‍ ഫെര്‍നാണ്ടോ ലോറന്‍ ടോട്ടന്‍ഹാമിന് വേണ്ടി വലകുലുക്കി. ഇതോടെ രണ്ട് പാദങ്ങളിലായി 2-2 എന്ന സ്‌കോറില്‍ സമനിലയായതിനെ തുടര്‍ന്ന് മത്സരം പെനാല്‍റ്റിയിലേക്ക് നീണ്ടു. 4-2 എന്ന സ്‌കോറിന് പെനാല്‍റ്റി സ്വന്തമാക്കി ചെല്‍സി ഫൈനലിലേക്ക് മാര്‍ച്ച് ചെയ്യുകയായിരുന്നു.