കല്‍പ്പറ്റ: പീഡനക്കേസില്‍ കുറ്റാരോപിതനായ ചൈല്‍ഡ് വെല്‍ഫെയര്‍ കമ്മിറ്റി ചെയര്‍മാന്‍ ഫാദര്‍ തോമസ് ജോസഫ് തേരകവും അംഗം സിസ്റ്റര്‍ ബെറ്റിയും ചൈല്‍ഡ് വെല്‍ഫെയര്‍ കമ്മിറ്റി സിറ്റിങില്‍ പങ്കെടുക്കുകയാണെങ്കില്‍ സിറ്റിങ് തടയുമെന്ന് എം.എസ്.എഫ് ജില്ലാ കമ്മിറ്റി മുന്നറിയിപ്പ് നല്‍കി.
എം.എസ്.എഫ് സംസ്ഥാന ജനറല്‍ സെക്രട്ടറി എം.പി നവാസ്, ജില്ലാ പഞ്ചായത്ത് വൈസ്പ്രസിഡന്റ് പി.കെ അസ്മത്ത് എന്നിവര്‍ ജില്ലാ കലക്ടറുമായി നടത്തിയ ചര്‍ച്ചയില്‍ ഇക്കാര്യം ആവശ്യപ്പെടുകയും ചെയ്തിരുന്നു.
 കുറ്റാരോപിതരായ ചെയര്‍മാനെയും അംഗത്തെയും പുറത്താക്കണമെന്ന് ആവശ്യപ്പെട്ട് എം.എസ്.എഫ് ജില്ലാ കമ്മിറ്റി മുഖ്യമന്ത്രി, ആരോഗ്യ സാമൂഹ്യനീതി വകുപ്പ് മന്ത്രി, സാമൂഹ്യനീതി വകുപ്പ് ഡയറക്ടര്‍ എന്നിവര്‍ക്ക് നിവേദനം നല്‍കിയിട്ടുണ്ട്. കുട്ടികളുടെ സംരക്ഷണം ഉറപ്പ് വരുത്തേണ്ട സമിതിയുടെ ചെയര്‍മാന്‍ പ്രതിയുടെ സംരക്ഷകനായ സ്ഥിതിയില്‍ അദ്ദേഹത്തിന് സിറ്റിങില്‍ പങ്കെടുക്കാന്‍ ധാര്‍മികതയില്ല.
അദ്ദേഹവും ആരോപണ വിധേയയായ അംഗവും സിറ്റിങില്‍ പങ്കെടുത്താല്‍ സിറ്റിങ് തടയുമെന്ന് ജില്ലാ പ്രസിഡന്റ് വി.പി.സി ലുഖ്മാനുല്‍ ഹക്കീം, ജനറല്‍ സെക്രട്ടറി റിയാസ് കല്ലുവയല്‍ എന്നിവര്‍ മുന്നറിയിപ്പ് നല്‍കി.