അന്തിക്കാട്: അന്തിക്കാട് കോള്‍പടവിലെ വള്ളൂര്‍ പാടശേഖരത്തില്‍ നെല്‍ച്ചെടികളില്‍ മുഞ്ഞ ബാധ കണ്ടെത്തിയതൊടെ കര്‍ഷകര്‍ ആശങ്കയിലായി. കാര്‍ഷിക സര്‍വകലാശാലയും കൃഷി വകുപ്പും സംയുക്തമായി ഇന്നലെ നടത്തിയ പരിശോധനയിലാണ് മുഞ്ഞ ബാധയും ബാക്ടീരിയയും കണ്ടെത്തിയത്.
പടവിലെ ഒന്നര ഏക്കര്‍ സ്ഥലത്താണ് നെല്‍ച്ചെടികള്‍ക്ക് മുഞ്ഞ ബാധിച്ചിട്ടുള്ളത്. മുഞ്ഞബാധ പടവില്‍ വ്യാപകമായി പടര്‍ന്നു പിടിക്കുമെന്ന ആശങ്കയിലാണ് കര്‍ഷകര്‍. തവിട്ടു നിറത്തിലുള്ള ചെറിയ പ്രാണികള്‍ നെല്ലിന്റെ കട ഭാഗത്ത് കൂട്ടം കൂടിയിരുന്ന് നെല്‍ചെടികില്‍ നിന്ന് നീരൂറ്റി കുടിക്കുന്നതുമൂലം ചെടികള്‍ മഞ്ഞളിക്കുകയും ക്രമേണ കരിഞ്ഞു പോകുകയും ചെയ്യും. മഞ്ഞളിപ്പും കരിച്ചിലും പാടത്ത് പല സ്ഥലങ്ങളിലായി വട്ടത്തിലാണ് ആദ്യം കാണുക.
ആക്രമണം രൂക്ഷമാകുമ്പോള്‍ നെല്‍പ്പാടം മുഴുവന്‍ കരിഞ്ഞുണങ്ങും. പുഞ്ചകൃഷിയിലാണ് മുഞ്ഞ ബാധകൂടുതലായി കാണുന്നത്.