ചെറുവത്തൂര്‍:  ഓടിക്കൊണ്ടിരുന്ന ഗുഡ്‌സ് ട്രെയിനിന്റെ ബോഗികള്‍ വേര്‍പെട്ടു. ചന്തേര റെയില്‍വേ സ്റ്റേഷന് സമീപം ഇന്നലെ ഉച്ചയ്ക്ക് പന്ത്രണ്ടോടെയായിരുന്നു സംഭവം. മംഗളൂരുവിലേക്ക് പോവുകയായിരുന്ന ട്രെയിനിന്റെ ഗാര്‍ഡ്കാബിന്‍ ഉള്‍പ്പെടെ നാല് ബോഗികളാണ് വേര്‍പെട്ടത്. ചന്തേര സ്റ്റേഷന്‍ കഴിഞ്ഞ് അഞ്ഞൂറ് മീറ്റര്‍ മുന്നോട്ട് നീങ്ങിയപ്പോഴാണ് ബോഗികള്‍ വേര്‍പെട്ട കാര്യം ലോക്കോ പൈലറ്റിന്റെ ശ്രദ്ധയില്‍ പെട്ടത്. ബോഗികള്‍ തമ്മിലുള്ള സെന്റര്‍ ബഫര്‍ കപ്‌ളിങ് വേര്‍പെട്ടതാണ് കാരണമെന്ന് റെയില്‍വേ അധികൃതര്‍ പറഞ്ഞു.  എന്‍ജിന്‍ ഉള്‍പ്പെടെയുള്ള ഭാഗം പിറകോട്ടെടുത്ത് ഘടിപ്പിച്ചതിന് ശേഷമാണ് ട്രെയിന്‍ കടന്നു പോയത്. ഇതുമൂലം അരമണിക്കൂര്‍ ഈ ട്രാക്കില്‍ ഗതാഗത തടസമുണ്ടായി. വിവരമറിഞ്ഞ് നൂറുകണക്കിനാളുകള്‍ ചന്തേരയില്‍ എത്തി.