മരട്(കൊച്ചി): ഗായത്രിവീണമീട്ടി ഗായിക വൈക്കം വിജയലക്ഷ്മിക്ക് ലോക റെക്കോര്‍ഡ്. ഗായത്രിവീണയില്‍ 51 ഗാനങ്ങള്‍ ഏറ്റവും കുറഞ്ഞസമയത്തില്‍ വായിച്ചാണു ലോക റെക്കോര്‍ഡ് പ്രകടനം. 51 ഗാനങ്ങള്‍ എന്ന ലക്ഷ്യം മറികടന്ന വിജയലക്ഷ്മി ഈ സമയത്തിനുള്ളില്‍ 67 ഗാനങ്ങളാണ് ഗായത്രിവീണയില്‍ വായിച്ച് തീര്‍ത്തത്.
കൊച്ചിയില്‍ ഹോട്ടല്‍ സരോവരത്തില്‍ നടന്ന കച്ചേരിയില്‍ രാവിലെ 10 മുതല്‍ ഒന്നുവരെ ശാസ്ത്രീയ സംഗീതവും ഒന്നുമുതല്‍ മൂന്നുവരെ വിവിധ ഭാഷകളിലെ  ചലച്ചിത്രഗാനങ്ങളും അവതരിപ്പിച്ചു.  
സര്‍ക്കാരിന്റെ ഹരിത കേരളം പദ്ധതിയുടെ ഭാഗമായി  പുഴ സംരക്ഷിക്കുക എന്ന ലക്ഷ്യത്തോടെ അഡ്വ. ഹരിദാസ് എറവക്കാട് രചിച്ച് ആനന്ദ് കൃഷ്ണ സംഗീതസംവിധാനം നിര്‍വഹിച്ച പുഴപറഞ്ഞത് എന്ന കവിതാസമാഹാരത്തിന്റെ വീഡിയോ പ്രകാശനവും വേദിയില്‍ നടന്നു.