ജിദ്ദ: വിദേശികള്‍ കൂടുതല്‍ പണമയക്കുന്ന രണ്ടാമത്തെ രാജ്യം സഊദി അറേബ്യയെന്ന് റിപ്പോര്‍ട്ട്. അമേരിക്കയാണ് ഒന്നാം സ്ഥാനത്തുള്ളത്. 2015ലെ കണക്ക് പ്രകാരം 145.5 ബില്യണ്‍ റിയാലാണ് (38.8 ബില്യണ്‍ ഡോളര്‍) സഊദിയില്‍നിന്ന് വിദേശ തൊഴിലാളികള്‍ നാട്ടിലേക്ക് അയച്ചത്.
ആഗോളാടിസ്ഥാനത്തില്‍ വിദേശ ജീവനക്കാരുടെ പണമിടപാടുകളെ കുറിച്ച് സഊദി ദിനപത്രമായ 'അല്‍റിയാദ് ' നടത്തിയ പഠനത്തിലാണ് പുതിയ കണ്ടെത്തല്‍. ഒന്നാം സ്ഥാനത്തുള്ള അമേരിക്കയിലെ വിദേശികളുടെ പണമിടപാട് 61.4 ബില്യണ്‍ ഡോളറാണ്.
2008 മുതല്‍ 2015 വരെയുള്ള കാലയളവില്‍ ആഗോളതലത്തില്‍ വിദേശികളുടെ പണമിടപാട് 24.1 ശതമാനം വളര്‍ച്ച നേടിയതായും റിപ്പോര്‍ട്ടില്‍ പറയുന്നു. 2015ല്‍ ലോകാടിസ്ഥാനത്തില്‍ വിദേശികള്‍ നടത്തിയ പണമിടപാട് 391 ബില്യണ്‍ ഡോളറാണ്. ഗള്‍ഫ് മേഖലയില്‍ സഊദിക്ക് പിന്നിലായി യു.എ.ഇയാണ് രണ്ടാം സ്ഥാനത്തുള്ളത്. 20.3 ബില്യണ്‍ ഡോളറാണ് 2015ല്‍ യു.എ.ഇയിലെ വിദേശികള്‍ നാട്ടിലേക്ക് അയച്ചത്. 2015ല്‍ ഗള്‍ഫ് രാജ്യങ്ങളില്‍ നിന്ന് ആകെ 99.8 ബില്യണ്‍ ഡോളര്‍ വിദേശികള്‍ നാട്ടിലേക്ക് അയച്ചതായും റിപ്പോര്‍ട്ടില്‍ പരാമര്‍ശിക്കുന്നുണ്ട്.