ടൂറിന്‍: സീരി എയില്‍ യുവന്റസ് അപരാജിതരായി മുന്നേറുന്നു. ഇന്നലെ നടന്ന മത്സരത്തില്‍ ഒന്നിനെതിരേ രണ്ട് ഗോളുകള്‍ക്ക് ലാസിയോയെയാണ് യുവന്റസ് പരാജയപ്പെടുത്തിയത്. 59ാം മിനുട്ടില്‍ എംറെ കാനിന്റെ സെല്‍ഫ് ഗോളില്‍ മുന്നിലെത്തിയ ലാസിയോയെ 74ാം മിനുട്ടില്‍ ജാവോ കാണ്‍സീലോയും 88ാം മിനുട്ടില്‍ പെനാല്‍റ്റിയിലൂടെ ഗോള്‍ നേടി ക്രിസ്റ്റിയാനോ റൊണാള്‍ഡോയുമാണ് രക്ഷിച്ചത്. യുവന്റസിനെതിരേ ലാസിയോ മികച്ച പ്രകടനമാണ് പുറത്തെടുത്തത്. ഗോള്‍ ലക്ഷ്യമാക്കി ലാസിയോ ആറ് ഷോട്ടുകള്‍ തൊടുത്തപ്പോള്‍ യുവന്റസ് മൂന്ന് ഷോട്ടുകള്‍ മാത്രമാണ് പോസ്റ്റിലേക്ക് പായിച്ചത്. ഗോള്‍കീപ്പര്‍ ഷെസ്‌നിയുടെ ഇടപെടലുകളാണ് യുവന്റസിന് തുണയായത്. ലീഗില്‍ 21 മത്സരങ്ങള്‍ കളിച്ച യുവന്റസ് 19ലും വിജയിച്ചിട്ടുണ്ട്. രണ്ട് മത്സരങ്ങളില്‍ സമനിലയും നേടി. രണ്ടാം സ്ഥാനത്തുള്ള നാപോളിയുമായി 11 പോയിന്റിന്റെ ലീഡിലാണ് യുവന്റസ്.
ബെന്‍സേമ
ഡബിളില്‍ റയല്‍
മാഡ്രിഡ്: ബെന്‍സേമയുടെ ഇരട്ട ഗോള്‍ ബലത്തില്‍ റയല്‍ മാഡ്രിഡിന് വിജയം. ലാലിഗയില്‍ 4-2ന് എസ്പാന്യോളിനെയാണ് റയല്‍ തകര്‍ത്തത്. നാലാം മിനുട്ടിലും 45ാം മിനുട്ടിലുമായിരുന്നു ബെന്‍സേമ വലചലിപ്പിച്ചത്. സെര്‍ജിയോ റാമോസ് (15), ഗാരെത് ബെയ്ല്‍ (67) എന്നിവരും റയലിനുവേണ്ടി ഗോള്‍ നേടി. 25ാം മിനുട്ടില്‍ ലിയോ ബാപ്റ്റിസ്റ്റോയും 81ാം മിനുട്ടില്‍ റൊസാള്‍സും എസ്പാന്യോളിന് വേണ്ടി ഗോള്‍ മടക്കി. 39 പോയിന്റുമായി പട്ടികയില്‍ മൂന്നാം സ്ഥാനത്താണ് റയല്‍.
റെന്നസിനെ തകര്‍ത്ത്
പി.എസ്.ജി
പാരിസ്: ഫ്രഞ്ച് ലീഗില്‍ റെന്നസിനെ ഒന്നിനെതിരേ നാല് ഗോളുകള്‍ക്ക് പി.എസ്.ജി പരാജയപ്പെടുത്തി. കവാനിയുടെ ഇരട്ട ഗോളുകളാണ് പി.എസ്.ജിയുടെ ജയം എളുപ്പമാക്കിയത്. 7, 71 മിനുട്ടുകളിലാണ് കവാനി ഗോള്‍ നേടിയത്.
എയ്ഞ്ചല്‍ ഡി മരിയ (60), എംബാപ്പെ (66) എന്നിവരും പി.എസ്.ജിക്കുവേണ്ടി ഗോള്‍ നേടി. 28ാം മിനുട്ടില്‍ നിയാങ്ങാണ് റെന്നസിന്റെ ആശ്വാസ ഗോള്‍ നേടിയത്. സൂപ്പര്‍ താരം നെയ്മര്‍ ഇല്ലാതെയാണ് പി.എസ്.ജി റെന്നസിനെ നേരിട്ടത്. കഴിഞ്ഞ മത്സരത്തില്‍ നെയ്മറിന് പരുക്കേറ്റിരുന്നു.