നെടുമ്പാശേരി: അനധികൃതമായി കടത്താന്‍ ശ്രമിച്ച 56 ലക്ഷം രൂപ വിലവരുന്ന സ്വര്‍ണ മിശ്രിതം നെടുമ്പാശേരി വിമാനത്താവളത്തില്‍ എയര്‍ കസ്റ്റംസ് ഇന്റലിജന്‍സ് വിഭാഗം പിടികൂടി. ഇന്നലെ പുലര്‍ച്ചെ എയര്‍ ഏഷ്യ വിമാനത്തില്‍ ക്വലാലംപൂരില്‍ നിന്നെത്തിയ മലപ്പുറം സ്വദേശിയായ യാത്രക്കാരനാണ് പിടിയിലായത്. പ്രത്യേകം കവറുകളിലാക്കിയ ഒന്നര കിലോഗ്രാം വരുന്ന മിശ്രിതം ഇയാള്‍ ശരീരത്തില്‍ ഒളിപ്പിച്ചിരിക്കുകയായിരുന്നു.
ഇത് കൂടാതെ ബുധനാഴ്ച ഒന്നരകോടിയോളം വിലവരുന്ന സ്വര്‍ണം കസ്റ്റംസ് വിഭാഗം പിടിച്ചെടുത്തിരുന്നു. ഖത്തര്‍ എയര്‍വേയ്‌സ് വിമാനത്തില്‍ ഇറ്റലിയില്‍ നിന്ന് ദോഹ വഴി എത്തിയ കോട്ടയം സ്വദേശികളായ രണ്ട് യാത്രക്കാരാണ് പിടിയിലായത്. ഇരുവരില്‍ നിന്നും മൂന്നര കിലോഗ്രാം സ്വര്‍ണമാണ് പിടികൂടിയത്. ഇവര്‍ അടുത്ത ബന്ധുക്കളാണ്.
കഴിഞ്ഞ മൂന്ന് ദിവസത്തിനിടെ 4.30 കോടി രൂപ വിലവരുന്ന 10.25 കിലോഗ്രാം സ്വര്‍ണമാണ് ഡയരക്ടറേറ്റ് ഓഫ് റവന്യൂ ഇന്റലിജന്‍സും (ഡി.ആര്‍.ഐ) കസ്റ്റംസ് വിഭാഗവും ചേര്‍ന്ന് പിടികൂടിയത്.