മോസ്‌കോ: സിറിയയിലെ വിമതകേന്ദ്രമായ ഇദ്‌ലിബില്‍ സംഘര്‍ഷം തുടരുന്നതിനിടെ തുര്‍ക്കി പ്രസിഡന്റ് റജബ് ത്വയ്യിബ് ഉര്‍ദുഗാന്‍ മോസ്‌കോയില്‍ റഷ്യന്‍ പ്രസിഡന്റ് വ്‌ളാഡ്മിര്‍ പുടിനുമായി കൂടിക്കാഴ്ച നടത്തി. സിറിയയിലെ സംഘര്‍ഷ വിഷയത്തില്‍ ഇരു നേതാക്കളും തമ്മിലുള്ള ചര്‍ച്ച മൂന്നു മണിക്കൂര്‍ നീണ്ടു.
സിറിയയിലെ പുതിയ സംഭവവികാസങ്ങളും ഇദ്‌ലിബിലെ സംഘര്‍ഷ നിരോധിത മേഖലയിലെ വെടിനിര്‍ത്തല്‍ ലംഘനവും ചര്‍ച്ചയില്‍ വന്നതായാണ് വിവരം. 2018ലെ വെടിനിര്‍ത്തല്‍ കരാര്‍ ലംഘിച്ച് സിറിയയില്‍ അസദ് ഭരണകൂടവും റഷ്യന്‍ സഖ്യസേനയും ആക്രമണം തുടരുകയാണ്. റഷ്യന്‍ പിന്തുണയുള്ള സിറിയന്‍ സേനയുടെ വ്യോമാക്രമണത്തില്‍ 33 തുര്‍ക്കി സൈനികര്‍ കൊല്ലപ്പെട്ടതിനു പ്രതികാരമായി കഴിഞ്ഞയാഴ്ച തുര്‍ക്കി സേന സൈനിക നടപടി നടത്തിയിരുന്നു. ബുധനാഴ്ച സിറിയന്‍ സേന നടത്തിയ ആക്രമണത്തില്‍ രണ്ടു തുര്‍ക്കി സൈനികര്‍ കൊല്ലപ്പെടുകയും ചെയ്തു. ഇന്നലെ റഷ്യന്‍ വ്യോമാക്രമണത്തില്‍ 16 സാധാരണക്കാരാണ് ഇദ്‌ലിബില്‍ കൊല്ലപ്പെട്ടത്.
അതേസമയം, 24 മണിക്കൂറിനുള്ളില്‍ 184 സിറിയന്‍ സൈനികര്‍ കൊല്ലപ്പെട്ടതായി തുര്‍ക്കി പ്രതിരോധ മന്ത്രാലയം പറയുന്നു. ഇത്തരത്തില്‍ മേഖലയില്‍ യുദ്ധഭീതി നിലനില്‍ക്കേയാണ് ഉര്‍ദുഗാനും പുടിനും കൂടിക്കാഴ്ച നടത്തിയതെന്നതു ശ്രദ്ധേയമാണ്.
കഴിഞ്ഞയാഴ്ചയാണ് വിമത നിയന്ത്രണ മേഖലയായ ഇദ്‌ലിബില്‍ സിറിയന്‍ സൈന്യം തുടര്‍ച്ചയായി ആക്രമണങ്ങള്‍ തുടങ്ങിയിരുന്നത്. ഇതിനു പിന്നാലെ ഈ മേഖലയിലെ അതിര്‍ത്തിയിലെ തുര്‍ക്കി സൈനികരും കൊല്ലപ്പെട്ടിരുന്നു. പിന്നാലെ, ഇനി തങ്ങളുടെ സൈനികരെ അക്രമിച്ചാല്‍ കനത്ത തിരിച്ചടിയുണ്ടാകുമെന്നു തുര്‍ക്കി മുന്നറിയിപ്പ് നല്‍കുകയും ചെയ്തിരുന്നു.