ന്യൂഡല്‍ഹി: ഇന്ത്യയില്‍ മൂന്ന് പേര്‍ക്കുകൂടെ കൊറോണ സ്ഥിരീകരിച്ചതോടെ കൊറോണ ബാധിതരുടെ എണ്ണം 34 ആയി. ലഡാക്കില്‍ രണ്ടുപേര്‍ക്കും തമിഴ്‌നാട്ടില്‍ ഒരാള്‍ക്കുമാണ് വൈറസ് ബാധിച്ചത്. ലഡാക്കില്‍ അസുഖ ബാധിതരായവര്‍ ഇറാനിലേക്കും തമിഴ്‌നാട്ടില്‍ അസുഖം ബാധിച്ച വ്യക്തി ഒമാനിലേക്കും സമീപകാലത്ത് യാത്ര ചെയ്തവരാണ്.

കൊറോണ പടരുന്ന സാഹചര്യത്തില്‍ രാജ്യം അതീവ ജാഗ്രതയിലാണ്. ജമ്മു, സാംബ എന്നീ ജില്ലകളിലെ എല്ലാ പ്രൈമറി സ്‌കൂളുകളും അടച്ചതായി സര്‍ക്കാര്‍ അറിയിച്ചു.കര്‍ണാടകയിലും യു.പിയിലും സര്‍ക്കാര്‍ ഓഫിസുകളില്‍ ബയോമെട്രിക് പഞ്ചിങ് ഒഴിവാക്കി. ഐ.ടി മേഖലയിലും ഒഴിവാക്കിയിട്ടുണ്ട്. ഉത്തര്‍പ്രദേശ് സര്‍ക്കാര്‍ മാര്‍ച്ച് എട്ടിന് നടത്താനിരുന്ന ഹോളി മിലാന്‍ ആഘോഷം ഒഴിവാക്കി.പരിശോധനക്കായി രാജ്യത്താകെ 52 ലാബുകള്‍ സജ്ജമാക്കിയതായി കേന്ദ്ര ആരോഗ്യ മന്ത്രാലയം അറിയിച്ചു. ഇന്ത്യ അടക്കം 78 രാജ്യങ്ങളിലാണ് ഇതുവരെ കൊറോണ റിപ്പോര്‍ട്ട് ചെയ്യപ്പെട്ടിരിക്കുന്നത്.