മലപ്പുറം: ജീവിതത്തില്‍ വലിയ അഭിലാഷങ്ങളുണ്ടാകുന്ന വിജയത്തിന് വഴിയൊരുക്കുമെന്ന് ജില്ലാ കലക്ടര്‍ എസ്. വെങ്കടേശപതി പറഞ്ഞു.   ആദിവാസി വിദ്യാര്‍ഥികള്‍ താമസിച്ചു പഠിക്കുന്ന പെരിന്തല്‍മണ്ണയിലെ സായ് സ്‌നേഹതീരം ഹോസ്റ്റല്‍ സന്ദര്‍ശിച്ച്  വിദ്യാര്‍ഥികളോട് സംസാരിക്കുകയായിരുന്നു കലക്ടര്‍. ആഗ്രഹിക്കുന്നത് നേടിയെടുക്കാമെന്ന ആത്മവിശ്വാസമുണ്ടാവണം. ഇതിനായി നന്നായി പഠിക്കണം. ഓരോരുത്തരും നിശ്ചിത സമയങ്ങളില്‍ നിര്‍വഹിക്കേണ്ടതായ കാര്യങ്ങള്‍ പിന്നീട് ചെയ്യാനായി മാറ്റിവെക്കരുത്.  ഇതു ജീവിത വിജയത്തിനു തടസമായി നില്‍ക്കുമെന്നു കലക്ടര്‍ പറഞ്ഞു. ജില്ലയില്‍ ആദിവാസി ക്ഷേമ പ്രവര്‍ത്തനങ്ങള്‍ ഊര്‍ജിതപ്പെടുത്തുന്നതിന്റെ ഭാഗമായാണു കലക്ടര്‍ ഹോസ്റ്റല്‍ സന്ദര്‍ശിച്ചത്. താഴെക്കോട് ഗ്രാമപഞ്ചായത്തിലെ 53 കുട്ടികളാണ് ഇവിടെ താമസിച്ചു പഠിക്കുന്നത്. ഒന്നു മുതല്‍ 12 വരെയുള്ള ക്ലാസുകളിലായി തൊട്ടടുത്ത സ്‌കൂളുകളിലാണ് ഇവര്‍ പഠിക്കുന്നത്. 27 ആണ്‍കുട്ടികളും 26 പെണ്‍കുട്ടികളുമുണ്ട്.  ഇവരോടൊത്തു ഭക്ഷണം കഴിച്ചു ഹോസ്റ്റലിലെ കുട്ടികളുടെ ആവശ്യങ്ങള്‍ കലക്ടര്‍ ജീവനക്കാരുമായി ചര്‍ച്ച ചെയ്തു.  
ജില്ലാ ഇന്‍ഫര്‍മേഷന്‍ ഓഫിസര്‍ വി.പി. സുലഭകുമാരി, സായ് സ്‌നേഹതീരം ട്രസ്റ്റ് വൈസ് പ്രസിഡന്റ് കെ.ആര്‍. രവി, സെക്രട്ടറി കെ.എസ്. ബോസ്, സര്‍ക്കാരിന്റെ വിവിധ വകുപ്പുകളില്‍ നിന്നും വിരമിച്ചു നിലവില്‍ ആദിവാസി വിദ്യാര്‍ഥികളുടെ ക്ഷേമവുമായി ബന്ധപ്പെട്ടു പ്രവര്‍ത്തിക്കുന്ന സന്നദ്ധപ്രവര്‍ത്തകര്‍ സംസാരിച്ചു.