മലപ്പുറം: ദേശീയ സമ്പാദ്യ പദ്ധതിയില്‍ മലപ്പുറത്തിനു 130 ശതമാനം വര്‍ധനവ്. 91.42  കോടിരൂപ മിച്ചസമ്പാദ്യമാണ് കഴിഞ്ഞ സാമ്പത്തിക വര്‍ഷം ജില്ല നേടിയത്.  സംസ്ഥാന സര്‍ക്കാര്‍ 70 കോടി രൂപയാണു മലപ്പുറത്തിനു സമാഹരണത്തിനു ലക്ഷ്യമിട്ടത്. ജില്ലയിലെ മൊത്ത നിക്ഷേപമായി ദേശീയ സാമ്പത്തിക പദ്ധതിയിലെ വിവിധ പദ്ധതികള്‍ക്കായി 723.86 കോടി രൂപ ജില്ലയില്‍ നിന്നും മൊത്തനിക്ഷേപമായി സ്വീകരിച്ചു.
22 കോടി സ്വരൂപിച്ച തിരൂരാണു ബ്ലോക്കുകളില്‍ ഒന്നാമത്. 20.91 കോടി സ്വരൂപിച്ചു താനൂര്‍ രണ്ടാം സ്ഥാനവും 15.8 രൂപ സമാഹരിച്ചു തിരൂരങ്ങാടി മൂന്നാം സ്ഥാനവും നേടി. വകുപ്പുകളില്‍ വാണിജ്യ വകുപ്പാണു മുന്നിലുള്ളത്. 2.37 കോടി രൂപ സമാഹരിച്ചാണ് ഒന്നാമതെത്തിയത്. 2.19 കോടി സമാഹരിച്ചു പ്രിന്‍സിപ്പല്‍ കൃഷി ഓഫിസ് രണ്ടാം സ്ഥാനത്തും 1.72 കോടി സമാഹരിച്ചു നിലമ്പൂര്‍ താലൂക്ക് ഓഫിസ് മൂന്നാം സ്ഥാനത്തുമെത്തി. സുകന്യ സമൃദ്ധി പദ്ധതിയില്‍ 9.42 കോടി സമാഹരിച്ചു. സഞ്ചയികാ പദ്ധതിയില്‍ 72,930 വിദ്യാര്‍ഥികളെ അംഗങ്ങളാക്കി.
2015-16 വര്‍ഷത്തെ മികച്ച പ്രവര്‍ത്തനങ്ങള്‍ക്കു ജില്ലക്കുള്ള പ്രശസ്തി പത്രം കഴിഞ്ഞ ദിവസം  തിരുവനന്തപുരത്തു നടന്ന ചടങ്ങില്‍ ധനകാര്യ അഡീഷനല്‍ ചീഫ് സെക്രട്ടറി ഡോ.കെ.എം.എബ്രഹാമില്‍ നിന്നും  ഡെപ്യൂട്ടി ഡയറക്ടര്‍ കെ.വി.രാമകൃഷ്ണന്‍ ഏറ്റുവാങ്ങി.