ആര്‍പ്പൂക്കര: സന്ധ്യാസമയങ്ങളില്‍  മദ്യപസംഘങ്ങള്‍ സ്ത്രീകളെ ശല്യപ്പെടുത്തുന്നതായി പരാതി. വില്ലൂന്നി മറ്റപ്പള്ളി റോഡിലാണ് റോഡരികിലിരുന്നു പരസ്യമായി മദ്യപിക്കുന്നവര്‍ സ്ത്രീകളെ ശല്യം ചെയ്യുന്നതായി പരാതി ഉയര്‍ന്നത്.
പുലര്‍ച്ചെ നടക്കാനിറങ്ങുന്ന സ്ത്രീകള്‍ക്കു നേരെയും ശല്യം ഉണ്ടാകുന്നതായും പരാതിയുണ്ട്. ഇത്തരം സാമൂഹ്യ വിരുദ്ധര്‍ക്കെതിരെ നടപടിയാവശ്യപ്പെട്ട് ജില്ലാ പൊലീസ് മേധാവി അടക്കമുള്ളവര്‍ക്കു പരാതി നല്‍കാന്‍ ഒരുങ്ങുകയാണ് പ്രദേശവാസികള്‍ .
  വില്ലൂന്നി മറ്റപ്പള്ളി പാലത്തിനു സമീപമാണ് പരസ്യമായി മദ്യപിക്കുന്ന സംഘങ്ങള്‍ സജീവമായിരിക്കുന്നത്.  പാലത്തിനു സമീപത്തും, ചുവട്ടിലുമായി ഇരുന്നു മദ്യപിക്കുന്ന സംഘങ്ങള്‍ രാത്രി വൈകി ഇതുവഴി സ്‌കൂള്‍ കുട്ടികളും, പെണ്‍കുട്ടികളും സ്ത്രീകളും കടന്നു പോകുമ്പോള്‍ അശ്ലീല പരാമര്‍ശം നടത്തുന്നതായും അശ്ലീല ആംഗ്യം കാണിക്കുന്നതായും പരാതിയുണ്ട്. ഇത്തരക്കാരുടെ ശല്യം ഭയന്ന് ഇതുവഴി യാത്ര ചെയ്യുന്നത് സ്ത്രീകള്‍ ഒഴിവാക്കുകയാണെന്നാണ് പരാതിയില്‍ പറയുന്നത്.
  പുലര്‍ച്ചെ നടക്കാനിറങ്ങുന്ന സ്ത്രീകളെയും ഒരു സംഘം ശല്യം ചെയ്യുന്നതായി പരാതി ഉയര്‍ന്നിട്ടുണ്ട്. സംഘം ചേര്‍ന്നു നടക്കാനിറങ്ങുന്ന സ്ത്രീകള്‍ക്കു നേരെ അശ്ലീല കമന്റുകള്‍ പറയുന്നതായും, മൊബൈലില്‍ചിത്രങ്ങളെടുക്കാന്‍ ശ്രമിക്കുന്നതായുമാണ് പരാതി.