തിരുവനന്തപുരം: സിനിമാ മേഖലയില്‍ സ്ത്രീകളുടെ സാന്നിധ്യം ശക്തിപ്പെടേണ്ടതു കാലഘട്ടത്തിന്റെ ആവശ്യമാണെന്നു മന്ത്രി എ.കെ ബാലന്‍. അഭിനയ രംഗത്തുപോലും പുരുഷന്റെ നിഴലായി സ്ത്രീ മാറുന്ന രീതിക്കു മാറ്റം വരണമെന്നും സ്ത്രീയുടെ വീക്ഷണ കോണില്‍നിന്നുള്ള സിനിമ ഉണ്ടാകണമെന്ന ലക്ഷ്യത്തോടെയാണു വനിതകളുടെ സംവിധാനത്തില്‍ ചലച്ചിത്രങ്ങള്‍ നിര്‍മിക്കുന്ന പദ്ധതിക്കു തുടക്കമിടുന്നതെന്നും മന്ത്രി പറഞ്ഞു.
ചലച്ചിത്ര വികസന കോര്‍പ്പറേഷന്റെ നേതൃത്വത്തില്‍ വനിതകളുടെ സംവിധാനത്തില്‍ സിനിമ നിര്‍മിക്കുന്ന പദ്ധതിയുടെ ഭാഗമായി 'ഡൈവോഴ്‌സ്' എന്ന ചിത്രത്തിന്റെ സ്വിച്ച് ഓണ്‍ നിര്‍വഹിക്കുകയായിരുന്നു മന്ത്രി.
കെ.എസ്.എഫ്.ഡി.സി. ചെയര്‍മാന്‍ ഷാജി എന്‍. കരുണ്‍, ഡെപ്യൂട്ടി മേയര്‍ രാഖി രവികുമാര്‍, ഹരിത കേരളം മിഷന്‍ വൈസ് ചെയര്‍പേഴ്‌സണ്‍ ടി.എന്‍ സീമ, യുവജന കമ്മിഷന്‍ ചെയര്‍പേഴ്‌സണ്‍ ചിന്ത ജെറോം, പ്ലാനിങ് ബോര്‍ഡ് അംഗങ്ങളായ കെ.എന്‍ ഹരിലാല്‍, മൃദുല്‍ ഈപ്പന്‍, വനിതാ ശിശുവികസന വകുപ്പ് ഡയരക്ടര്‍ ടി.വി അനുമപ, കെ.എസ്.എഫ്.ഡി.സി ബോര്‍ഡ് അംഗം ഭാഗ്യലക്ഷ്മി, മാനേജിങ് ഡയരക്ടര്‍ എന്‍. മായ പങ്കെടുത്തു.

കൊല്ലം: കേന്ദ്രത്തിന്റെ നിഷേധാത്മക നിലപാട് പൊതുവിതരണ സംവിധാനത്തെ മുന്നോട്ടുകൊണ്ടുപോകുന്നതിന് സഹായകമല്ലെന്ന് സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍. കേരള റേഷന്‍ എംപ്ലോയീസ് ഫെഡറേഷന്‍ സംസ്ഥാന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. സംസ്ഥാന സര്‍ക്കാരുമായി ആലോചിക്കാതെ ഏകപക്ഷീയമായി ഉദ്യോഗസ്ഥര്‍ എടുക്കുന്ന തീരുമാനം ഭക്ഷ്യവിതരണ രംഗത്ത് പ്രശ്‌നങ്ങള്‍ സൃഷ്ടിക്കുന്നതായും അദ്ദേഹം പറഞ്ഞു.
ഭാരവാഹികളായി ജെ. ഉദയഭാനു (പ്രസിഡന്റ്), മീനാങ്കല്‍ കുമാര്‍ (വര്‍ക്കിങ് പ്രസിഡന്റ്), പി. ജി പ്രിയന്‍കുമാര്‍ (ജനറല്‍ സെക്രട്ടറി), മുണ്ടുകോട്ടയ്ക്കല്‍ സുരേന്ദ്രന്‍ (ട്രഷറര്‍), മലയടി വിജയകുമാര്‍, കെ.പി വിശ്വനാഥന്‍ (ഓര്‍ഗനൈസിങ് സെക്രട്ടറിമാര്‍) എന്നിവരെ തെരഞ്ഞെടുത്തു.