തിരുവനന്തപുരം: ലോക വനിതാ ദിനം ആഘോഷപൂര്‍വം കൊണ്ടാടുമ്പോഴും സ്ത്രീകള്‍ക്കും കുട്ടികള്‍ക്കും വേണ്ടിയുള്ള പദ്ധതികളുടെ നടത്തിപ്പില്‍ സര്‍ക്കാരിന് അലംഭാവമെന്ന് കണക്കുകള്‍. മാര്‍ച്ച് എട്ടു വരെയുള്ള കണക്കുകള്‍ പ്രകാരം 2019-20 സാമ്പത്തിക വര്‍ഷം വനിതാ, ശിശുക്ഷേമത്തിനായുള്ള ഫണ്ടില്‍ നിന്ന് സര്‍ക്കാര്‍ ആകെ ചെലവഴിച്ചത് 43.97 ശതമാനം തുക മാത്രമെന്ന് ധനകാര്യ വകുപ്പിന്റെ തന്നെ കണക്കുകള്‍ സൂചിപ്പിക്കുന്നു.
ഇതില്‍തന്നെ പദ്ധതികള്‍ക്കായി നീക്കിവച്ചതില്‍ 45.91 ശതമാനം തുക വനിതാ ശിശുക്ഷേമ വകുപ്പ് വിനിയോഗിച്ചപ്പോള്‍ സംസ്ഥാന വനിതാ ശിശുക്ഷേമ കോര്‍പറേഷന് ആകെ അനുവദിച്ച തുകയില്‍ 15.06 ശതമാനം മാത്രമാണ് ആറു പദ്ധതികള്‍ക്കായി ചെലവഴിച്ചത്. സംസ്ഥാന വനിതാ കമ്മിഷന്‍ 45.45 ശതമാനം ഫണ്ടും കുട്ടികളുടെ അവകാശങ്ങള്‍ സംരക്ഷിക്കുന്നതിനുള്ള കമ്മിഷന്‍ 80.25 ശതമാനം ഫണ്ടും ഇതുവരെ വിനിയോഗിച്ചിട്ടുണ്ട്.
ദേശീയ പോഷകാഹാര മിഷനില്‍ നിന്ന് 17.9 കോടി രൂപ സംസ്ഥാനത്തെ പദ്ധതിക്കായി ലഭിച്ചപ്പോള്‍ ഇതുവരെ ചെലവഴിച്ചത് 64.96 ലക്ഷം മാത്രം. അതായത് 3.63 ശതമാനം. സംസ്ഥാനത്തെ അങ്കണവാടികളെ കമ്മ്യൂണിറ്റി റിസോഴ്‌സ് സെന്ററുകളാക്കി മാറ്റുന്നതിനു ലഭിച്ച 12 കോടിയില്‍ 3.44 കോടി മാത്രമേ ചെലവിട്ടുള്ളൂ. വളരെ സുപ്രധാനമായ നിര്‍ഭയ പദ്ധതിക്കായി 80 കോടി മാറ്റിവച്ചതില്‍ 14.4 കോടി ചെലവഴിച്ചപ്പോള്‍ ആകെ ചെലവായത് 18.01 ശതമാനം തുക മാത്രം.
വനിതാ ശിശുക്ഷേമ വകുപ്പും വനിതാ വികസന കോര്‍പറേഷനും വനിതാ കമ്മിഷനും കുട്ടികളുടെ അവകാശങ്ങള്‍ സംരക്ഷിക്കുന്നതിനുള്ള കമ്മിഷനുമെല്ലാം ചേര്‍ന്ന് 50 പദ്ധതികള്‍ക്കായി കഴിഞ്ഞ സാമ്പത്തിക വര്‍ഷം ചെലവഴിച്ചത് 43.97 ശതമാനം തുക മാത്രമാണ്.